ORANJESTAD (AAN)- Durante ultimo añanan nos por a ripara un cresemento den popularidad di e deporte di ciclismo aki na Aruba. Ciclismo di ruta, mihor conoci como road biking pero mas tanto Mountain Biking, MTB, a mira un crecemento substancial di personanan cu ta practica e deporte.
Asina nos por observa tur dia ciclistanan coriendo rond na tur parti di Aruba. Cu e crecemento aki a bin tambe varios club di ciclismo rond di Aruba. Un di e clubnan nan aki ta San Fuego Cycling Club cu a wordo funda na 1999 y cu a produci varios bon coredor durante su existencia.
Durante e ultimo 2 añanan San Fuego Cycling Club no tabata mucho activo pero ta pasando den un reorganisacion y pa 2019 kier bini bek cu un team di hobenan di 13 pa 17 aña, mucha muher y mucha homber pa participa na caredanan di Road y MTB. Pa cuminsa no ta importante si tin un road bike of un mountainbike despues di un tempo e hoben mes lo por escoge cual di nan dos e ta prefera di sigi practica.
E programa di preparacion pa e temporada 2019 ta cuminsa dia 6 di November proximo ariba diamars y diahuebs pa 4:30 di atardi y ariba diasabra pa 7:00 di mainta. Nos lo cuminsa cu e parti di preparacion físico cu lo ta ariba diamars y diahuebs pa cual lo no tin meste di bicicleta.
Ariba diasabra nos lo hasi uso di bicicleta. E parti di preparacion aki lo tin un duracion di 4 pa 6 siman. Despues di esaki nos lo bai over mas ariba bicicleta.
Pa mas informacion por tuma contacto cu Reinaldo Mackintosh na cel 5935427 of por manda un mensaje tambe via e mesun number.
