Home Parlamento Ley di LTU no tabata cuadra mas cu cambionan cu a bin...

Ley di LTU no tabata cuadra mas cu cambionan cu a bin cu tempo

89
0
SHARE
- Advertisement -

Parlamentario Edgard Vrolijk (MEP):

ORANJESTAD  (AAN): A trata e ley di LTU (Landsverordening Toelating en Uitzetting). Un ley cu sigur mester a conoce cambionan debi cu e no ta cuadra mas cu cambionan cu a bin cu tempo y segun tratadonan internacional, pero e ley hunto cu e maneho hiba e ultimo 8 añanan a haci hopi daño na Aruba y tambe na e hende. Banda di esaki un ley cu tabata carece na un mecanismo di control na su lugar debidamente y tambe den hopi area tabata demasiado soepel.

Ley contamina cu a crea problema

Ora bo analisa y husga actonan di e actornan di pasado y hopi awe ainda ta hunga manera cu nan ta Papa di Roma, pero ta netamente nan mes a contamina e ley y hunto cu ex Minister pa 8 aña a yuda sigui perhudica esnan cu a haya permiso y cu a yega nan limite pa por aplica pa paspoort awendia ta sinta cu problema pasobra nan permiso no tabatin un base legal, mientras cu nan a haci Aruba nan pais y nan yiunan tambe cu awendia ta pega cu mesun problema.

Banda di esaki tin un cantidad grandi cu pa falta di administracion y burocracia awendia no por sigui studia afo mientras nan a sigui nan carera completo na Aruba y a cumpli, pero pa falta di un permiso basa riba formalidad nan no por aplica pa naturalisacion.

Den pasado hopi di esnan menciona como ehempel a haya prolongacion di e mesun Swiss Model aki di tres aña (mientras cu esaki tabata prohibi y a haya 3 aña di prolongacion) y na momento di cambio di gobernacion a sigui haya nan permiso pasando tur procedura exigi pero awo a bin resulta cu e permisonan bao Gabinete Eman no tin base huridico y cu esaki Hulanda no ta reconoce si no trece cambio mientras mayoria tin mas cu 10 permiso na Aruba y mesun cos nan yiunan.

Cambionan

A kita e Swiss model debi cu for di 2009 e no ta den funcion y tambe e pais di su origen esaki no ta ni aplicabel mas y cu el a ser contamina y no ta cumpli cu standard internacional. Pero esaki no kiermen cu porta a ser habri pa tur hende.

E lo sirbi pa corigi erornan di pasado pero tambe marca e proceso nobo, unda cu e ley ta duna hopi espacio pa control, pues mas autoridad na nos cuerponan, e posibilidad pa tin mas criterianan pa hala aden permisonan y tambe a percura pa ontheffing no ta existi mas unda cu Minister di Labor mester haci un bon investigacion y si yega pa duna conseho positivo e exigencia na e compania ta pa por percura pa educa un local pa e trabao aki den futuro.

Banda di esaki nos a hisa e drempel pa bin Aruba tambe y un ehempel conoci ta cu na momento cu haya permiso y inscribi ta haya AZV, pero den e ley aki e doño tin di paga premie na gobierno pa cubri AZV. Y asina tin mas exigencia y tambe criterianan cu a ser poni y tambe a labora extensamente riba e problematica di matrimonio ficticio cu na e momentonan aki cu e maneho di pasado ta manera hiba awa lama y tambe aki riba ta bin condicionnan pa sigura cu por controla e fenomeno aki.

Minister mester ta bek na parlamento

E ley aki ta exigi e minister pa ta bek aki 18 luna pa duna cuenta y e ta sirbi pa evalua con e ley a cana y si mester tin cambionan pa mehora esaki. Y esaki ta netamente e muestra cu nos di parlamento ta tuma e tema aki hopi na serio y no ta yega vota pa un ley y laga e minister bay haci locual e kier, pero ta netamente locual pueblo a pidi pa controla y percura pa transparencia y ta pesey e minister mester ta bek aki 18 luna.

Nos no tin tempo pa crea panico y hunga populista mientras nan mes ta parti di e problema, pero nos ta busca solucion. Realidad tambe ta cu mientras cu tin trabaonan cu nos mesun hendenan no kier of por haci y alaves cada proyecto ta exigi importacion di hende, nos ta haya nos cu e problematica di permiso pero a lo menos e ley aki ta regula esaki mihor y alaves tin e mecanismo di control na lugar p’asina nos no haya e caos mas di pasado.

Como ultimo ta bon pa ora di tratamento di leynan asina importante pa pueblo sigui esaki y scucha e minister p’asina por ta bon informa y no ser mal informa pa hendenan cu un draaiboek personal.

 

- Advertisement -

DUNA COMENTARIO

Please enter your comment!
Please enter your name here