Home Gobierno Ley di Prohibicion di Plastic ta drenta na vigor

Ley di Prohibicion di Plastic ta drenta na vigor

172
0
SHARE
- Advertisement -

Entrante 1 di Januari 2019:

ORANJESTAD (AAN)—Minister di Infrastructura sr. Otmar Oduber, a elabora den conferencia di prensa Diahuebs mainta, tocante e Ley di Plastic Ban.

Esaki ta un ley cu gobierno kier pa drenta na vigor dia 1 di Januari 2019. Esaki ta un ley cu ta concentra su mes den dos parti specifico: un ta loke nan ta haya “single use plastic” cu ta abarca tur loke ta wordo uza den cuminda, manera forki, cuchio, cuchara, beker, etc., y tambe e productonan di foam cu normalmente ta wordo duna ora cumpra cuminda chines, of popularmente ora tin fundraising, etc.

E mandatario a corda cu prome cu e productonan aki a cuminza wordo uza, tabata tin cahanan di carton. Anteriormente, restaurant no tabata conoce foam pero esaki ta algo cu a bin cu modernizacion, pero cu a trece su consecuencianan pa nos medio ambiente, y di otro banda tin e prohibicion cu ta bin riba oxybenzone sunscreen, cu ta un ingrediente cu particularmente ta wordo uza pa proteha for di solo.

E mandatario a duna di conoce cu Aruba, compara cu otro partinan di mundo, pa loke ta trata uso di oxybenzone, ta casi seis biaha mas halto cu e average y e problema cune ta, cu tin consecuencianan grandi pa nos medio ambiente, y particularmente pa nos coralnan.

Minister Otmar Oduber a acentua cu como pais cu kier proteha e bida marino, ta prohibi esaki.

E mandatario a indica cu gobierno di Aruba a haya un elogio grandi di Nacionnan Uni pa e decision aki, na momento cu a atende den SDG’s unda tin varios punto ta wordo trata.

Gobierno a dicidi pa cuminza cu esaki dia 1 di Januari proximo, y e lo conta pa prohibicion di importacion di e productonan aki y tambe e produccion local.

E mandatario a señala cu ta duna tempo durante un aña, sin defini e sancion ainda pa esnan cu si ta produci y importa e productonan aki, pa locual a wordo bestel caba pa no perhudica e comerciante y cu esaki por wordo uza ainda, pero definitivamente pa aña 2020 e implementacion di sancionnan lo wordo introduci.

E mandatario a subraya cu el a pidi conseho na DNM (Departamento Natuur & Milieu) pa loke ta trata e productonan alternativo por wordo uza. E dignatario a subraya cu den varios ocasion e productonan aki tin un costo mas halto. E otronan ta mas barata pero ta mas dañino pa nos medio ambiente, y gobierno a base di e conseho cu a ricibi, lo kier introduci di biaha hunto cu e ley aki, un tipo di pakete di incentivo fiscal specialmente pa e productonan alternativo, tanto pa e comerciantenan cu kier produci esaki como pa esnan cu ta importe.

E mandatario a subraya cu asina e prijs por ta menos costoso y no ta cay den e nivel di prijs halto cu nan tin na e momentonan aki.

- Advertisement -

DUNA COMENTARIO

Please enter your comment!
Please enter your name here