Home Gobierno Minister di Infrastructura ta reconoce y gradici DOW pa e trabao grandi...

Minister di Infrastructura ta reconoce y gradici DOW pa e trabao grandi tumando lugar

44
0
SHARE
- Advertisement -

Riba infrastructura di caminda rond Aruba:

ORANJESTAD (AAN)—Diahuebs mainta a tuma lugar e conferencia di prensa di Gobierno, den cual a hiba palabra Minister Otmar Oduber, Titular di Infrastructura, Medio Ambiente y Desaroyo Teritorial.

E mandatario a cuminza pa reconoce y gradici  DOW pa e trabaonan sumamente grandi y importante cu nan ta realizando na e momentonan aki.

Oduber a menciona cu mientras e tabata den exterior, e hunto cu e director di maneho di DOW a tuma e decision, mirando e cantidad di yobida cu a cay y ta sigui cay riba nos Isla, pa duna atencion na e infrastructura di caminda, den e diferente barionan, y tin un accion completo cu ekiponan pisa di DOW, y mas cu 30 plug cu ta trahando riba e accion aki den tur bario.

E mandatario a splica cu e decision aki a wordo tuma a base di un inventario haci riba e camindanan sumamente pober, cu tin na e momentonan aki y cu ta bisto den tur nos barionan cu tin deficit enorme, pa loke ta trata calidad di infrastructura di caminda.

No solamente pasobra no a percura pa mantene e camindanan, y por nota den cayanan principal, Boulevardnan, etc., cu nan ta den un estado deplorable, cu hopi crack cu a bira buraco.

Tin hopi zakmento y zinkmento di caminda cu ta tumando lugar, manera por a mira ultimo di na Havenstraat unda a dicidi di cambia asfalt pa beton, loke a resulta un experimento sumamente positivo.

E mandatario a expresa cu el a keda sumamente satisfecho te na e momentonan aki, pero tin camindanan di tera y santo cu ta sumamente malo.

E mandatario a elogia DOW pasobra e ta cumpliendo cu e tarea, cual no ta facil, sin embargo banda di e trabao cu ta tumando lugar, gobierno a pone 9 miyon florin disponible, despues cu no tabata tin ni wegenfonds mas, pasobra gobierno anterior a elimina esaki, pa proyectonan pa asfalta y traha camindanan nobo den diferente bario, y tambe pa drecha esnan existente, manera na Seroe Pita cu ta conoci cu e ta den un estado sumamente malo.

E trabao aki lo cuminza na Januari proximo, y asina aki hopi otro caminda principal lo haya mantencion renovacion, y lo percura pa den cada bario unda mester pone camindanan nobo di asfalt y lo sigui henter e siman aki y e proximo seis simannan aki ainda, prome cu fin di aña. Banda di esaki lo pone un presupuesto adicional. E siman aki, precisamente, a reuni dentro di e bureau unda a percura tambe pa por a haya medionan extra disponible specialmente pa camindanan di tera y buraconan riba caminda wordo derecha. Greis ta bay wordo uza na diferente caminda pa alivia e situacion.

E dignatario a subraya cu lo mester pone atencion na e presupuesto siguiente, pa drecha e situacion di nos camindanan na Aruba.

Minister Otmar Oduber a indica cu den hopi bario e habitantenan ta contento unda cu hopi meter cuadra di asfalt a wordo basha, pasobra pa 30 aña largo nan tabata wardando, pero tin hopi bario mes ainda cu no a yega na turno y cu tin hopi aña wardando tambe, y pesey e discusion lo bin ora trata e presupuesto, tanto supletorio di e aña aki ainda, como e presupuesto pa aña 2019 y e añanan siguiente.

 

- Advertisement -

DUNA COMENTARIO

Please enter your comment!
Please enter your name here