Ora a baha como director AZV
ORANJESTAD (AAN) — Minister di Salud Publico Dangui Oduber, a actualiza informacion den conferencia di prensa, tocante e asina yama “Big Registration” pa docternan Arubano cu studia y gradua den nos region y na Merca.
Minister Dangui Oduber a referi na e comision cu a keda institui na cuminzamento di aña, cu casi siete luna a discuti diferente opcion y posibilidad pa yega na un solucion cu por fin por reconoce tur persona naci na Aruba, cu ta studia medicina den nos region.
Na momento cu e Comision a yega na un consenso, mi a sali publicamente declara cu AruBIG por fin lo bira un realidad.
E mandatario a subraya cu pa su sorpresa algun siman despues, e director saliente di AZV sr. Anko Ringeling, cu tabata presente den e ultimo reunion y cu a participa activamente den henter e proceso, y a bisa cu e ta na fabor di e proposicion cu a wordo discuti y a yega na consenso, pero ora el a baha como director di AZV el a sali declara cu tin discusionnan andando riba AruBIG y cu ningun momento a yega na un consenso.
“Locual mi ta lamenta profundamente, pasobra bo no por sinta na mesa cu henter e comision, bisa cu bo ta di acuerdo cu e proposicion como director di AZV y ora bo baha como director bo ta sali bisa cu no, cu nan ta den discusion ainda”, Minister di Salud Publico a declara.
Di otro banda, e titular ta contento cu e director nobo a duna un declaracion y bisa cu e ta di acuerdo y ta sostene e proposicion cu tin riba mesa; cu AZV ta di acuerdo numa cu nan tin algun pregunta. “Semper nos ta habri como gobierno pa contesta tur pregunta y tur preocupacion cu tin. Segun mi tin entendi, tin resistencia cerca cierto specialistanan y docternan di cas, cu nan ta teme pa e calidad di cuido.
“Na momento cu nos a institui e Comision nos a bisa hopi cla, cu importante den henter e proceso aki ta, pa nos mantene un nivel di calidad di cuido hopi halto. Esey tabata e punto di salida na momento cu nos a habri e discusion riba AruBIG. Na ningun momento nos kier trece e calidad di cuido cu nos ta ofrece na nos pacientnan, den discusion”, e mandatario a subraya.
Pesey, e dignatario a sigui bisa, parti di e proceso tabata pa instala un Instituto di Calidad. Y nos como pais, e ora ey, ta bay determina cual ta e nivel di calidad di cuido cu ta aceptable pa nos comunidad y cu comunidad ta spera riba dje.
“Nos por tuma ehemplo di Hulanda, Costa Rica, Colombia, Merca of un combinacion di tur, pero nos como pais ta determina kico ta nos calidad di cuido. Pesey mi kier pone enfasis riba dje, cu na ningun momento e intencion lo ta pa crea discusion cu pasobra nos ta bay brinda nos yiunan di tera, studiantenan cu ta naci na Aruba studia na Costa Rica of na Colombia, cu nos ta bay trece e calidad di cuido den discusion”, e mandatario a subraya.
