Home Social Olivia Figaroa celebrando 35 aña como Bibliotecaria Hubenil na BNA

Olivia Figaroa celebrando 35 aña como Bibliotecaria Hubenil na BNA

246
0
SHARE
- Advertisement -

ORANJESTAD (AAN) – Matutino DIARIO a entrevista sra. Olivia Figaroa, Bibliotecaria Hubenil na Biblioteca Nacional, ken diasabra 1 di December awor ta cumpli 35 aña den servicio.

Relatando un tiki di su trayectoria, el a conta nos cu na aña 1975 O el a caba Colegio Arubano, y di eynan Sticusa a otorgue un beca.

Sticusa tabata un organo cu tabata abarca e seis Islanan di Caribe Hulandes, y tabata specializa den proyectonan cu tin cu haci cu cultura y tabata duna beca e hobennan cu kier a studia den e ramo di arte y cultura.

Olivia a dicidi di bay Hulanda pa studia pa Bibliotecaria. Un estudio do dos aña pa bira Asistente y un aña mas pa specializa.

“Mi a traha den un Biblioteca na Hulanda y durante un vacacion cu a mi a bin pasa na Aruba, na 1982 mi a wordo pidi pa un diputado si mi kier bin traha aki, pasobra e edificio di Biblioteca nobo a caba di habri. Esaki na September 1982. E ora ey mi a bay Hulanda bek pa cuminza haci e preparacionnan, anto mi a yega Aruba 22 di November 1983 y a cuminza traha dia 1 di December”, Olivia a menciona.

E trabao tabata encera organiza actividadnan pa mucha. E tempo ey e acercamento tabata hopi mas personal entre e mucha y e bibliotecaria. Aworaki e sistema digital a trece hopi cambio den esey.

“Conhuntamente cu ex-directora sra. Alice van Romondt nos a trece e Festival di Buki na Aruba, 26 aña pasa. E tabata y ta keda un festival basta grandi. Te ainda e festival ta sigui bao maneho di directora Astrid Britten”, Olivia a menciona.

Olivia semper a keda hopi activo cu e Festival di Buki, pero awor cu tin hende nobo nan mester experiencia e festival pero e ta keda yuda.

Ta hopi actividad Olivia a organiza den su trayectoria interesante aki. El a menciona actividadnan manera verteltoren, e tempo ey tur diamars y diahuebs segun edad di e mucha. Ainda e ta tuma lugar pero riba diamars so y pa tur edad.

El a traha programa vacacional di lesamento, fiesta di carnaval, celebracion di Pasco, etc., y ademas tabata yuda e muchanan cu huiswerk.

Tambe tur dia e muchanan tabata bin Biblioteca despues di scol y tabata keda te atardi. Nan tabata bin lesa buki, haci huiswerk, biblioteca manera un traimerdia.

Na añanan 96-97 e sistema di computer a drenta Biblioteca Nacional, y ainda e ta hopi uE tempo ey ainda tabata tin un contacto mas cercano cu e bibliotecarianan, pero e cambio a bin cu uso di tablet y celular moderno cu nan por haci hopi mas cu antes.

“E studiantenan ta sinta haci nan huiswerk pero cabes abao y ora nan mester informacion, of un buki special, of ora tin spreekbeurt nan ta acerca nos mesa di informacion”, Olivia a comenta.

El a acentua cu e meta di biblioteca ta pa e lector sea adulto of mucha bay cas cu un bon buki.

Hopi interesante ta cu Olivia ta duna hopi charla na Aruba y den e otro Islanan di Reino, tocante promocion di buki y lesamento, y boluntariamente, e gusta yuda fundacionnan cu tin di haber cu lesamento, manera Bon Nochi Drumi Dushi y Fundacion Papiamente.

Pa Olivia ta hopi importante,  como trahador di Biblioteca, aporta su granito di arena cu promocion di buki y lesamento.

“E cultura di lesamento a crece door cu scolnan mes tin nan biblioteca y nan mes ta fia buki, y awor nos tin MFA den distrito, y ami mes ta hayando donacion di bukinan nobo for di un señora, tambe di boekhandel y Directie Onderwijs, particularnan y banconan specialmente pa e skinanan di buki den e MFAnan”, Olivia a menciona.

Olivia a comenta cu e bukinan cu mas e lectornan ta busca na Biblioteca ta novela na Hulandes y na Ingles, y aworaki Papiamento tambe ta wordo hopi pidi, vooral cu awe scol tin examen na Papiamento.

Den su trayectoria di 35 aña Olivia a haci di su hoby su trabao. “Esey mi ta haya cu bo ta crece den bo sentimentonan tambe; mi bista a bira mas hancho y mi ta habri pa tur sorto di idea, pa tur sorto di mundo, pa diferente cultura y pensamento. Pa mi nada ta straño mas. Esey a yuda mi habri mi mente, y respeta e paisnan mi bishita y cu ya mi conoce via buki”, Olivia a expresa.

Pa conclui Olivia Figaroa a comenta cu aworaki e kier pasa su conocimento y experiencia pa otronan cu ta mas hoben pa e trabao por sigui. “E trabao di biblioteca nunca ta caba. Nos a haya un par di trahador nobo cu ta hopi motiva, y mi ta purba siña nan e trabao y voraal e motivacion, cu ta hopi importante”, Olivia a comenta.

Como cu Biblioteca a bira su di dos cas y su coleganan su famia el a expresa: “Mi kier gradici tur mi colega y ex-coleganan cu a guia mi y yuda mi ora cu mi a bin biba bek na Aruba, den tur sentido. Biblioteca a bira mi cas y nan a bira mi famia”. Asina el a finaliza e entrevista cu DIARIO, evidentemente orguyoso y satisfecho di su 35 añanan como Bibliotecaria Hubenil na BNA.

 

- Advertisement -

DUNA COMENTARIO

Please enter your comment!
Please enter your name here