Home Salud OMS ta mustra e complicacionnan cu ta aparece cu transcurso di tempo

OMS ta mustra e complicacionnan cu ta aparece cu transcurso di tempo

21
0
SHARE
- Advertisement -

Na Aruba 8.3% di nos poblacion ta diabetico:

ORANJESTAD (AAN) – Luna di November ta e luna pa duna atencion special na e malesa cronico cu yama DIABETES. E dia Mundial pa concientizacion riba Diabetes (sucu den sanger) ta dia 14 di November, pues Diahuebs otro siman.

En conexion cu e observacion pa e dia aki, Organizacion Mundial di Salud “OMS”, a saca un publicacion den cual e ta indica cu pa aña 2030, Diabetes lo ta e di siete causa di morto na mundo.

Matutino DIARIO tambe kier aporta su pipita di santo riba concientizacion, cu algun articulo combinando e informe di OMS y recordando parti di locual e director di IBISA sra. Monique van Embden a trece dilanti den un conferencia di prensa reciente.

Na Aruba, unda tambe e problema ta conoci, e porcentahe di diabetes cerca nos pueblo ta halto, y tin esun latente unda tin un grupo cu ta registra como diabetico pasobra kizas nan mes no sa cu tin e malesa, of no kier sa.

Directora di IBISA sra. Monique van Embden, a señala  cu IBISA ta desaroyando un programa di concientizacion durante henter e luna aki.

El a splica cu e aña aki e concientizacion mundial di OMS, ta den cuadro di e famia, den sentido cu henter un famia ta wordo afecta si tin un solo miembro cu ta sufri di e malesa cronico aki.

Y den e informe di OMS sigur ta enfatiza riba e consecuencianan frecuente cu Diabetes ta causa, si e pacient no ta sigui un tratamento, no ta haci movecion, no ta come saludable y no ta tene cuenta si e problema por ta genetico den e famia.

OMS ta alerta cu den transcurso di tempo Diabetes por daña e curazon, e adernan, wowo, nier y nervio.

E ta indica cu e adultonan cu ta sufri di diabetes:

– tin dos pa tres bez mas riesgo di infarto di miocardio y accidente cardiovascular

– Neuropatia di pia combina cu reduccion di e fluho sanguine ta aumenta e riesgo di ulcera na pia, infeccion y como consecuencia final: amputacion.

– Retinopatia diabetica ta un causa importante di ceguera y ta e consecuencia di e daño den e adernan fini di e retina, cual ta acumula den transcurso di tempo. 2.6% do e casonan di ceguera, mundialmente, ta consecuencia di diabetes.

– Diabetes ta un di e causanan principal di insuficiencia renal.

Siguiendo cu sra. Van Embden, el a referi na OMS tambe, cu ta indica cu si e medio ambiente di un persona no ta sostene e habitonan saludable, e ta hopi dificil pa mantene esaki y esey ta conta pa Diabetes tambe.

E dama a menciona cifra registra cu ta indica cu 8.3% di nos comunidad tin diabetes diagnostica. Esey kiermen cu tin hende eyfo cu tin sintomanan y por ta nan ta sospecha pasobra nan salud tin biaha ta faya, pero nan no ta diagnostica, no ta trata, y no ta biba manera mester pa percura cu nan ta preveni e problema.

 

 

- Advertisement -

DUNA COMENTARIO

Please enter your comment!
Please enter your name here