ORANJESTAD (AAN): Presupuesto 2019 a keda entrega na presidente di Parlamento, riba cual Sr. mr. Juan “Ady” Thijsen ta amplia mas ariba e tratamento di esaki den Parlamento.
Sr. Juan “Ady” thijsen a splica cu pa ora e presupuesto a drenta, ya caba a pone fecha pa tratamento di esaki. Parlamentarionan lo tin chens di haci pregunta te dia 3 di december, cual lo worde manda pa gobierno, cu lo mester contesta esaki den un siman. Parlamento a para duro ariba e hecho cu lo trata e presupuesto di tal manera cu tur minister lo ta apart y asina lo ta mas gefocus ariba e carteranan. Asina e pueblo ta sigui tambe e reunionnan mas miho. Ta concentra ariba esey so.
Tambe Sr. Thijsen a splica cu e supletoire begroting tambe ariba schedule. E lo sali e siman benidero for di Raad van Advies. Te cu awo, e fecha tentativo di e tratamento di e supletoire begroting ta entre 3 y 4 di december. Pero si e lo por worde trata prome cu e presupuesto di 2019 mes. Te ainda tur cos ta canando di tal manera cu lo logra cu esaki.
Parlamento lo drenta recess dia 21 di december y ta trahando structural, y hopi duro pa keda cla cu tur cos prome cu 21 di december, Gobierno y tambe e departamentonan mester haci nan trabao, pa asina tur cos keda cla. Tambe lo trata e cambionan den ley di LTU cu ta importante pa pais Aruba.
Den e Centrale Commissie, ora cu a pone e fecha pa loke ta trata hacimento di pregunta, tur e fraccionnan tabata di opinion te cu 3 di december ta tempo suficiente haci nan pregunta. Parlamentarionan mester tin oportunidad pa haci nan pregunta y durante tratamento haya full nan 20 minuut pa debati y haci pregunta, pa dialoga y discuti cu e ministernan, pa asina haci uzo di nan derecho y esey ta locual cu kier cumpli cun’e, segun presidente di Parlamento, Sr. mr. Juan “Ady” Thijsen.
