Home General Prome Minister a ricibi bishita oficial di representantenan di UNDP

Prome Minister a ricibi bishita oficial di representantenan di UNDP

151
0
SHARE
- Advertisement -

ORANJESTAD (AAN): Durante un conferencia di prensa, Prome Minister Evelyn Wever-Croes a indica cu e siman aki nan tabatin bishita oficial di Sr. Magdy Martinez-Soliman, representante residente di UNDP (United Nations Development Program) y Srta. Sharifa Ali-Abdullah, representante residente adhunto di UNDP.

Prome Minister a bisa cu vision di gobierno di Aruba ta ‘ser humano ta central’, esaki ta algo cu ta den mesun liña cu e guia cu Nacionnan Uni ta duna na paisnan ‘con pa combati pobreza’ y ‘con pa crea prosperidad’, como tambe medidanan pa crea progreso y bienestar pa nan pueblo.

Nacionnan Uni ta un instituto cu ta conoci pa trabaonan cu nan ta haci riba tereno di derechonan humano, pa mantene paz den paisnan den conflicto, den nan esfuerzonan pa combati pobreza. Tres aña pasa, Nacionnan Uni a tuma e posicion, y mayoria di paisnan a adopta e posicion aki, cu pa combati pobreza, no por lubida ser humano, kiermen no por concentra solamente riba un desaroyo economico, no por corda solamente riba placa, sino mester pone ser humano central. E meta final ta pa no laga ningun hende atras.

Gobierno a pone esaki como un liña cora den nan maneho di gobernacion, pone ser humano central y atraves di ser humano, rond di e ser humano, busca progreso y bienestar pa henter comunidad.

E mandatario a splica cu nan tabatin un relacion di trabao cu UNDP pa algun aña caba. Aruba ta haciendo esfuerzonan maximo pa por implementa diferente metanan di ‘sustainable development goals’ cu Nacionnan Uni a pone pa paisnan adopta, y den e cuadro aki, un delegacion di UNDP a yega Aruba pa discuti esaki. El a probecha di gradici e representantenan pa tur loke nan ta haciendo pa Aruba.

Sr. Magdy Martinez-Soliman, representante di UNDP, a splica cu nan ta un socio di Aruba, nan ta un socio den agenda di desaroyo di metanan sostenible. Agenda 2030 ta un agenda pa prosperidad, pa hendenan, pa e planeta, pa paz y pa sociedad. E ta basa riba desaroyo economico, y proteccion social, y eradicacion di pobreza, cu ta temanan cu nan a discuti cu Conseho di Minister y Prome Minister.

El a splica cu UNDP ta agencia mas grandi di sistema di Nacionnan Uni, cu ta traha cu mas di 150 pais y teritorionan, na unda nan ta duna asistencia tecnico na gobiernonan, nan ta mobiliza fondonan pa paisnan y nan ta asocia cu nan coleganan, specialmente den desaroyo di islanan chikito. Den contexto aki, nan trabao den Latinoamerica y Caribe, ta mira desafionan comun di economia y sociedadnan, sea den infraestructura, turismo sostenible, y energia. Esaki ta problemanan cu ta comun den e sociedad y economianan den e areanan aki.

Sr. Martinez-Soliman a indica pa loke ta trata Aruba, nan a enfoca riba un programa relaciona cu oportunidad di proteccion social y bienestar, y eradicacion di pobreza. El a expresa cu durante nan bishita, cu a dura 3 dia, na unda nan a reuni cu hopi persona, departamento y organizacionnan, nan a haya e impresion di un sociedad den movecion, y sociedad dinamico, di un gobierno cu firme den nan maneho, un parlamento cu ta hibando un debate ‘vibrante’ riba prioridadnan pa e pais.

Y e ta termina su palabranan cu e ta kere cu, e talento y capacidad na Aruba ta supera cualkier desafio y problemanan cu nan por enfrenta. E no tin duda cu futuro ta den bon caminda pa pueblo di Aruba, y e isla ta y lo continua como un bon lugar pa biba.

 

 

- Advertisement -

DUNA COMENTARIO

Please enter your comment!
Please enter your name here