Home General Puntonan di atencion relaciona cu e tema di ‘schorsing’

Puntonan di atencion relaciona cu e tema di ‘schorsing’

236
0
SHARE
- Advertisement -

Plataforma Hobennan Profesional ta informa:

ORANJESTAD (AAN):  Schorsing ta presenta cu hopi frecuencia den e tereno laboral. Un aspecto di schorsing cu merece atencion adicional ta e pago of e falta di pago durante e periodo aki. Den un caso asina ta importante pa e trahado tin conocimento general riba e topico aki pa por para pa su derechonan. 

Kiko schorsing ta encera?

Schorsing ta ora un persona wordo declara inactivo laboralmente pa un periodo stipula. Den e periodo aki e trahado ta wordo manda cas y no ta wordo permiti pa traha. Schorsing ta accion disciplinario sin mester kita un persona for di trabou. 

Dos situacion den cual schorsing por wordo ehecuta

Na prome lugar, esaki por sosode den un forma di pre-aviso, pa un accion laboral di cierto grado no bolbe ripiti. E schorsing por wordo ehecuta tambe pa asina durante e periodo ey hasi algun investigacion tocante temanan laboral mas serio, cu lo por tin manera consecuencia un retiro inmediato di e trahado. Algun ehempel di motibonan cu por resulta den un schorsing por ta entre otro ladronicia (cual ta rekeri investigacion), incumplimento laboral (cual den un fase anterior ya caba tawatin un advertencia), fraude of comportamento inaceptabel na pia di trabou. 

Proteccion di pago a base di articulo 1614c di nos Codigo Civil

Articulo 1614c inciso 1 di nos codigo civil ta duna e trahado un proteccion den caso di schorsing. A base di articulo 1614c e trahado cu a wordo geschorst mester sigui wordo paga na e manera cu e lo a traha si e schorsing no lo a tuma lugar. E derecho aki ta a base di e echo cu e trahado no ta cumpli cu su tarea nan laboral a consecuencia  di e propio decision di e doño di trabou. Inciso 6 di e mesun articulo ta remarka cu e ley aki ta uno obligatorio y cu no mag di desvia di dje. 

Tres excepcion riba e proteccion di pago

Tin tres ocasion unda cu un schorsing mag wordo duna sin pago. Articulo 1614c inciso 7 ta menciona e prome motibo; door di un acuerdo por escrito. E di dos ta door di un CAO. Y e di tres ta door di un areglo domestico. Si ta door di un acuerdo por escrito, por ehempel den e contract di trabou, e trahado mester wordo poni hopi bon na altura di esaki. Por medio di CAO nifica cu esaki mester wordo stipula door di e sindicato cu e trahado of e compania ta afilia na dje. Door di un areglo domestico, cual ta ora cu e compania tin un regla interno cu ta bisa cu e schorsing no ta wordo paga. 

Hurisprudencia

E derecho di pago di salario durante e periodo di schorsing a base di articulo 1614c ta wordo confirma den e hurisprudencia Van der Gullik/ Vissers & partners. E  hurisprudencia aki ta bisa cu asina mes cu e doño di trabou tin un motibo di peso suficiente pa schors e trahado door di e culpa di e trahado mes, e trahado ta mantene su derecho ariba pago di salario.

Plataforma pa Hobennan Professional (PHP) ta spera di por a informa e ciudadano nan un tiki mas tocante e tema di schorsing y pa e trahado conoce su derecho den e area laboral cu ley den man. PHP tey tur diasabra na Cas di Partido AVP pa informa pueblo tocante tema nan manera esaki y hopi mas.

Si bo persona ta desea di tin mas informacion tocante e tema di schorsing, por pasa libremente tur diasabra na Cas di Partido di 2PM – 4PM unda e miembro nan di PHP lo ta cla pa duna asistencia.

- Advertisement -

DUNA COMENTARIO

Please enter your comment!
Please enter your name here