ORANJESTAD (AAN) – Robert Anjie CURPA ta indica cu recientemente Parlamento di Aruba a hasi cambionan den e ley di LTU cu ta un acto di traicion contra Aruba. E cambionan aki entre otro ta deshaci di e swiss model cu tabata pone cu un persona no por tin un permiso mas cu 3 aña y tambe ta habri e porta pa famia di esun cu tin e permiso bin Aruba.
Nos no por compronde con politiconan cu supuestamente ta bisa cu nan ta stima Aruba ta haci contrario y ta sigui habri e fronteranan hancho habri pa mas stranhero drenta Aruba cu tur e consecuencianan negativo ariba varios nivel manera entre otro social, economico, capacidad di cargo, finansas publico y no di papia mes di perdemento di identidad.
Partido CURPA tabata e unico partido cu un maneho fuerte pa cera y controla nos fronteranan y combati ilegalidad. Ningun partido a durf di bin cu un maneho fuerte asina pa miedo di perde voto.
“Den nos programa “Vol is vol!” Nos e describi extensivo con nos lo a cera y controla e fronteranan. Un pais sin fronteranan no ta un pais. Entre otro nos lo a termina cu e fenomeno di cheap labor door di pone un paro temporal per direct na otorgamento di permisonan di trabou y ilegalidad. Di e forma aki salarionan lo subi sin mester hisa minimumloon y mas entrada lo a drenta den caha di gobierno, fondonan di AZV y AOV pensioen y cartera di e trahador.
Nos lo a kita beneficionan di esnan cu permiso di trabou cu mester ta pa Arubianonan y esnan cu e nacionalidad Hulandes so manera AZV, AOV pensioen, otorgamento di tereno erfpacht etc. Nos lo a para naturalisacion pa haya paspoort Hulandes of haci esaki dificil pa haya. Tambe nos lo a introduci boetnan halto pa companianan cu ta emplea ilegal y asina mi por menciona mas cos cu lo a percura cu e fronteranan di Aruba ta bon cera y controla.
Aruba ta vol y nos no por sigui laga stranhero drenta pa loco si nos kier of no pasobra tardi of tempran esaki lo hasi daño na Aruba. Tin hopi politico cu ta casa, tin un pareha stranhero of ta descendiente di un stranhero no por saca e parti emocional for di e parti di un bon maneho di migracion cu ta na e bienestar di Aruba y tambe e ilegal y e stranheronan legal pasobra e ultimo dos gruponan aki ta sigui cai den mas abuso y pobresa cu e maneho nobo anti Arubiano di e gobierno aki.
E pais mester ta na prome lugar y no bo emocion nan. Cu e cambionan den LTU Aruba lo bay perde su identidad, e pueblo lo perde oportunidadnan di un trabou husto y digno y gastonan lo bay sigui subi sky high pa gobierno y e fondonan di AZV y AOV creando un situacion social-economico desastroso.
Politiconan y hendenan cu ta apoya un maneho di migracion cu ta habri e fronteranan hancho habri pa jan en alle man drenta pa ami ta un traidor di e pais y no por ta stima Aruba. Si stimacion pa un pais ta destruccion di un pais anto mehor no stima.
