ORANJESTAD(AAN): Situacion ta sigui tenso den Cuerpo di Aduana.
Sindicato di Aduana, esta SADA, riba Dialuna a presenta na gobierno, pasobra no por haci esey e siguiente dia. Diamars SADA tin tambe un reunion general cu nan miembronan.
Douaneronan ta disgusta pasobra nan ta sinti cu nan ta worde intimida door di gerencia di cuerpo di Douane.
Edward Maduro, presidente di e sindicato tabata hunto cu su coleganan di directiva dilanti bestuurskantoor, despues di a entrega un carta na gobernacion.
El a splica cu e carta a worde entrega na Minister di Finanzas y cc. Minister Presidente, informando nan cu diamars mainta 8’or, nan lo tin un reunion extraordinario na e kantoor principal, unda cu lo bay atende e ultimo desaroyonan pa loke ta e Cuerpo di Douane.
Manera cu tur hende sa, desde 2015 cu e directiva actual a tuma e sindicato over, nan ta hibando un maneho hopi transparente y hopi profesional, tratando di resolve e problemanan na mesa sinta, te unda cu nan por.
Na varios ocasion, lamentablemente a recuri na e ultimo recurso di bay afo. Sinembargo, fin di siman pasa, diahuebs, a worde sorprendi cu algo cu nan a kere cu hamas a bay pasa, y vooral den un estado di derecho cu ta bibando na Aruba.
E director di Douane a tuma e curashi di raporta e presidente di sindicato, y hasta bay asina leu di pidi medidanan discipliinario contra di dje, mirando cu den su concepto, e a saca informacionnan secreto di e departamento den prensa.
Pa asombro di Maduro, ora cu el a mira den e rapport cu director Ricky Croes a traha, el a lesa citaatnan cu el a saca for di den corant unda cu aki no ta papia di ningun tipo di secreto. Mas bien ta cosnan cu ta bin di andando y cu tur hende sa.
Por ehempel Maduro a menciona cu e containerscan tin lunanan largo, pa no bisa añanan, no ta traha. El a traha un paar di tempo, despues el a cay afo back.
E no ta un secreto cu e containerscan no ta trahando. Despues di a inverti tnto miyon pa drech’e y ainda esaki no ta funcionando, unda cu ta pone cu tin un mankement pa cual ta e funcionamento di e cuerpo.
Un di e motibonan di e containerscan ta, pa meramente controla containernan cu riba un maneho nobo cu tin, cual tampoco no ta secreto, unda cu cierto containernan ta haya groen, nan ta sali for di waf sin seyo. No ta secreto cu tin containernan cu ta saliendo for di waf sin seyo, cual e sindicato no ta mucho di acuerdo cu esaki.
Maduro a sigui splica, manera cu a indica tanto na director y minister na varios ocasion cu e seyo di container ta e unico recurso caminda cu e ambtenaar di douane ta haci su control, dado caso cu un of otro cos por pasa.
Eynan ta pone cu awa a pasa hariña. Ta pa e motibo aki a yama e reunion cu e miembronan y alavez ta invita cualkier ex douanero, pensionado cu ta sinti nan mes yama pa bin duna un sosten, pa asina por duna un of otro conseho tambe pa loke ta sosodiendo.
No ta normal cu un director ta purba di trata na silencia un sindicato.
Si permiti esaki, y combersando cu otro presidente di sindicatonan, cu esaki no ta aceptabel. Awe ta trata di cera e sindicato SADA su boca. Pero mañan e por sosode cu e otro sindicatonan tambe. No por permiti esakinan.
A informa minister cu esaki sigur no lo bay keda te aki, pasobra lo bay manda cartanan afo. Esakinan sigur sigur lo bay pone Aruba den un luz hopi negativo.
No por ta asina cu ta bin purba di silencia un sindicato. Un sindicato tin su trabao pa haci. E tin cu bringa derechonan pa e trahado. Si e director no ta tende di e sindicato, si e minister no tende di e sindicato, kico mester haci? Keda keto y laat de boei maar waaien?
Maduro a enfatisa cu esey no ta bay pasa. E directiva aki y miembronan ta hopi rabia pa loke e director a purba di haci. Ta bisto tambe cu ora bo no tin argumento mas pa defende bo persona riba cosnan cu e sindicato ta trece dilanti, pa señala cu cos no ta bayendo bon den maneho di Douane y ora cu argumentonan caba pa por saca bo curpa, bo ta recuri na un paso asina bao di faha di trata di raporta y bin purba di silencia e sindicato, cual esey no lo bay pasa, Maduro a splica.
