Speed Andrade a bay den Welga di Hamber

    700
    0
    SHARE
    - Advertisement -

    ORANJESTAD (AAN): E combersacion den pueblo ta sigui enfoca riba e detencion di 4 miembro di prensa tanto siman pasa como e siman aki, rond di supuesto walkie-talkienan di sistema Tetra-radio di Cuerpo Policial.

    E periodista Nelson ‘Speed’ Andrade tambe a wordo deteni Diamars mainta trempan na su cas.  Pero funcionarionan di LandsRecherche no a ni drenta su cas pa busca supuesto Tetra-radio.

    Ni na cas di Marko Espinoza (24ora) ni den poder di Nelson Andrade (24ora y Enfoque 90) no a haya Tetra-radio.

    Tog nan a bay cu Andrade, y a somete na interogacion unda a lanza monton di pregunta riba dje.  Sinembargo Andrade no a contesta nada.  El a informa e oficialnan di LandsRecherche cu e no ta bay papia nada, y djis no hacie mas pregunta tampoco.  El a bisa esey, notificando nan cu simplemente awor e ta convenci cu e sistema hudicial, y tambe Husticia en general riba e isla ta corupto.  Y ta sorprendi con hopi poder un Ministro di Husticia tin pa haci tur esaki riba miembronan di prensa na Aruba.

    Simplemente bisa, no a haya ningun Tetra-radio den su poder, ni den poder di Marko Espinoza, ni den poder di 24ora.com

    Pero tog, LandsRecherche bao guia di Fiscal a opta pa hinke den Cel pa demostra na dje, ta kende realmente tin poder na Aruba.

    Aki ta unda cu Nelson Andrade a informa e funcionarionan di LandsRecherche, cu e ta bay den Welga di Hamber como protesta.

    Y esey a start Diamars caba!  Despues di sesion di interogacion, nan a trece cuminda pe.  Aki Speed Andrade a nenga di come.  Mas atardi nan a trece sandwich pe, y e no a come tampoco.  El a djis bebe tiki awa.

    Speed Andrade kier protesta e forma corupto cu a detene hende cu acusacion falso.

    E no ta contento con e sistema di Husticia awor ta funcionando na Aruba, unda con cu autoridad nan por djis yega y encarcelabo pasobra “nan ta pensa” cu algo ta pasando.  E funcionarionan a bise cu nan no ta acuse di ladronicia, etc., pero ta “un sospecho tin”.

    Con por ta cu LandsRecherche djis tin “un sospecho”, pero tog bo ta wordo encarcela?  Nan no a siña kico a caba di pasa recien cu e dos personanan inocente coriendo Pickup pafo di Fatima College na Dakota?  Den caso di Andrade, nan tin encarcela, siendo no a haya ningun Tetra-radio den poder di trahadornan.  Pero e ta cera si.

    Esaki ta creando duda den e imparcialidad di Husticia y e forma cu Recherche ta investiga casonan.

    “Pesey mes, nunca Recherche no a ni yega di resolve un ladronicia di Wasmachine di casnan na Aruba,” un persona a comenta Diaranzon.

    Mientras tanto Abogado mr. Chris Lejuez, a laga sa cu e ta haya ironico cu Polis a perde un Tetra-radio na Warda di Polis, y kico Fiscal ta haci?  E ta core encarcela miembro di Prensa.  Que hubo di Polisnan mes?  Pasobra te dia di awe no a tende nunca cu un periodista a breek-in y horta un Tetra-radio for di Warda di Polis.

    Y lo peor ta cu ya caba tin 4 periodista cu a worde cera.

    Awe Diahuebs of Diabierna, Huez Comisario lo tin di tuma decision si ta bay alarga su detencion of lage liber.  E lo haya un dossier unda LandsRecherche tin di pone pruebanan riba papel.    Kico nan lo skirbi?  Geen bewijsmateriaal gevonden?  Varios observador ta pensa cu lo tin di laga Andrade liber, pero ya na Aruba, awor bo no sa con cierto hendenan por sigui demostra nan poder.  Y esey ta tristo.  Djis corda riba e pober personanan deteni pasobra muchanan di school lo a tende un motor di Pickup a back-fire via e muffler, y nan a core inventa storia.

    Ministro y Ministerio Publico a purba defende nan mes cu conferencia di prensa, y Ministro a haya par di pregunta pica den su direccion, y el a hasta bira nervioso.

    Loke ta trece satisfaccion, ta cu pueblo ta mirando e “wega politico” aki, cu ta parce di a wordo empeora pa un guera di media.  Y awor tin un periodista cu a worde cera, y no ta comiendo.

    Sociedad Interamericana de Prensa cu sede na Miami, cu semper ta denuncia abiertamente casonan di inhusticia cometi contra periodistanan den Latino America, tambe ta siguiendo e caso aki di cerca.  Ya caba SIP a manda siman pasa carta pa Ministerio Publico y tambe pa Ministro riba e detencion di e 3 periodistanan.

    E siman aki, un biaha mas Sociedad SIP for di Miami a manda carta pa mas funcionario na Aruba, incluyendo Gobernador di Aruba pa denuncia loke ta pasando cu Nelson Speed Andrade.  E reclamo ta con por ta cu Aruba ta permiti un periodista wordo encarcela bao acusacion sin base.

    Oficialnan di Ministerio Publico a purba di smile y bisa cu esaki no ta un wega politico, pero un caso penal.

    Okay señor Procurador General.  Si acaso a yega y haya un Tetra-radio na cas di Speed Andrade, e ora enberdad e ta un caso penal.

    Pero te aworaki no a haya nada.  Niks di e Tetra-radio.  Pues pesey den bista di hopi hende, basa riba loke a pasa na Mei 2018 y tambe October 2018, y e decision di Ministro, cu el a bira un “wega politico”.

    Di con Mei 2018?  E pensamento ta cu tur cos a cuminza, ora cu un Atraco a socede na luna di Mei, y por a mira ex-Ministro Arthur Dowers presente na e lugar pa check cu e victimanan kico a pasa.

    Ministro Andin Bikker aparentemente no a gusta esey, y el a core cuminza check e asunto di Tetra-radio y lo a haci denuncia algun dia despues.

    Di e tempo ey a cuminza cu un investigacion, y esaki e desemboca e ultimo dianan aki cu aresto di e periodistanan cu ta traha cu medio cu ta hopi liga cu MEP, y tambe periodistanan cu ta hopi liga cu AVP.   Pero a tende nada di con NO a investiga periodistanan hopi liga cu POR.?

     

    - Advertisement -

    DUNA COMENTARIO

    Please enter your comment!
    Please enter your name here