Home General Trump ta e decision di Merca  enfrente mundo

Trump ta e decision di Merca  enfrente mundo

184
0
SHARE
- Advertisement -

Moneda y economia di Aruba ta mara na Merca

Resultado lo tin impacto regional pa Aruba 

ORANJESTAD  (AAN) — Diamars 6 di november 2018 lo keda graba como un dia sumamente importante den historia di Merca. Dos aña prome y dos aña despues di eleccion di un Presidente, Merca a vota pa un cantidad di miembronan di Senado (Senate), miembronan di Parlamento (House of Representatives), Gobernador y otro funcionnan cu na Aruba no ta mara na eleccion manera Hues y sheriff.  Merca, na un forma cu mundo no kier a spera, a bisa “si” na e forma di gobernacion di e actual Presidente Donald Trump, cu hopi hende a spera cu lo a conoce un derota total. Pa henter mundo y sigur pa Aruba y e region Latino Americano e resultado ta sumamente importante. 

Poco bes, un eleccion di Congreso, Gobernadornan y otro funcionnan di autoridad na Merca, tabatin tanto interes.

Despues di dos aña di critica diario di tur sector na Merca y mundo riba e gobernacion di Presidente Donald Trump, hopi a spera cu awe e escenario pa baha Presidente Donald Trump y pone un fin na su filosofia di maneho di e pais, lo a ser logra.

Esey no ta e caso. En bista di e resultado grandi cu e lo tin pa Aruba, awe DIARIO ta duna un splicacion kico a pasa y kico por spera den e futuro cercano.

IMPORTANCIA GOBERNACION MERCA PA  ARUBA 

Awe un biaha mas, desaroyonan mundial ta spierta Aruba cu mester tene cuenta cu e realidad Arubano den mundo.

Na prome luga Aruba mester comprende cu den e panorama mundial, Aruba ta conecta na Merca pa medio di su Florin. Si balor di Dollar subi of baha, Aruba lo sinti esaki ya cu for di 1971 ora base di cambio monetario existente a basha abou, e Florin ta mara na Dollar Mericano.

Esaki tin como resultado un stabilidad monetario extremo pa Aruba enfrente e pais for di cual Aruba ta importa bienes. E ta facilita turismo y trafico comercial internacional.

Na segundo luga, Merca ta e sosten grandi di e sector di turismo di Aruba. Riba e tereno aki no mester mira unicamente e turistanan y nan luga di origen, pero tambe inversionistanan Mericano cu a sostene economia Arubano riba tur tereno.

E refineria di Aruba, cu originalmente a ser construi pa acomoda Exxon,  awe ta pendiente loke lo pasa cu CITGO na Merca, cu ta un di asuntonan di vital importancia pa Venezuela, Aruba y cantidad di entidad rond mundo.

Na tercer luga, e situacion geografico di Aruba ta papia. Aruba ta situa dilanti America Latino, Venezuela, cu actualmente ta den un guera frio cu Merca mescos cu ta e caso cu China, aliado di Venezuela pero opositor di Merca.

Den tur e situacionnan internacional na cual Aruba ta directamente mara, e decision di pueblo di Merca pa confirma cu nan ta sostene Presidente Trump, ta sumamente importante.

E CAMBIO DEN HOUSE OF REPRESENTATIVES Y DONALD TRUMP 

For di prome cu eleccion Pueblo di Merca tabata bon na haltura cu Presidente di Merca, Donald Trump, tabata e figura central.

Oponentenan di e Presidente a lansa un atake sin limite riba Donald Trump pa asina afecta e resultadonan pa loke ta trata eleccion di Congreso y otro puestonan importante na Merca. A spera cu e Partido Democrat, den cual cantidad di gruponan minoritario y oponentenan di Trump a uni, lo a crea un situacion constitucional pa baha Presidente Trump of en todo caso haya poder total den Congreso y uza tur posibilidad cu e sistema constitucional ta brinda nan, pa deshaci di e maneho di Trump.

Esaki no a sosode y un analisis di e resultado Mericano a mustra con grandi e sosten na Donald Trump di parti di e pueblo Mericano ta.

Congreso ta consisti di Senate (Eerste Kamer na Hulanda) y House of Representatives (Tweede Kamer na Hulanda). Tin derechonan cu Senado tin y House of Representatives no tin.

Si e dos partinan di Congreso uni, nan por opone na forma extremo e Presidente cu como dirigente eligi di e pais tambe tin un cantidad di derecho pa sostene su posicion democratico.

E situacion extremo cu a spera, no a ser alcansa.

DECISION DI MERCA Y MANEHO INTERNACIONAL 

Den e eleccion actual,  Merca a confirma su sosten na Presidente Donald Trump. Cifranan ta duna un bista cla.

Na un forma determinante, for di tempran tabata bisto cu Partido Republicano di Presidente Trump a alcansa e mayoria necesario di 51 porciento y hasta a crece den voto pa alcansa e mayoria den Senate.

Tabata spera un Blue Wave, un ola blauw, cu lo a aplasta e mayoria Republicano den e otro parti di Congreso, House of Representative.  Representantenan Democrat a haya e mayoria den House of Representatives pero no na e forma espectacular cu a pensa .

220 Democrat y 196 Republicano a drenta House of Representatives cu ta un diferencia di 24. E no ta un situacion cu por ser uza contra Presidente Trump, debi na e hecho cu hopi bes e eleccionnan dos aña despues cu un presidente sinta, ta baha e sosten na su partido den Congreso.

23 Gobernador Democrat y 25 Gobernador Republicano ta confirma e sosten cu pueblo di Merca a sigui duna Grand Old Party, manera ta yama e Partido Republicano.

DIARIO ta sigui pendiente di e resultadonan cu eleccion Mericano lo tin pa e region y pa Aruba cu manera ta ser mustra aki tin un laso importante cu Merca.

- Advertisement -

DUNA COMENTARIO

Please enter your comment!
Please enter your name here