ORANJESTAD(AAN): — Dialuna mainta, den careda di 10’or a sosode un accidente basta serio, patras di faro. Un UTV cu turista, kendenan tabata riba un Offroad a accidenta. Polis a wordo manda cu maximo urgencia na e sitio.
Na momento cu polis a yega, nan a manda pidi pa un ambulance bin mas pura, pasobra tin un turista cu lo a fractura su pia of su heup tambe.
Segun informacion, e vehiculo aki tabata coriendo poco duro y durante e maniobranan cu nan tabata haci cu e vehiculo, a dal den un buraco y a bolter.
E pasahero na banda a resulta herida, cu heridanan di fractura. Na momento cu ambulance a yega, paramediconan a transporta e persona pa hospital pa asina e haya tratamento medico.
Mester a bay wordo opera mesora, mirando e fracturanan cu el a haya. E vehiculo a wordo poni bek riba wiel y a avisa e compania pa bin busca nan vehiculo patras di faro. E tabata un incidente cu un solo vehiculo envolvi.
