Minister di Husticia a menciona:
ORANJESTAD (AAN) – E siman cu ta bin Minister di Husticia mr. Andin Bikker, lo inaugura un parti di e facilidadnan nobo pa detencion di personanan cu mester wordo deporta for di Aruba.
Den conferencia di prensa di gobierno, Diahuebs mainta, e dignatario a referi na e aspecto aki.
E mandatario a indica cu den e cambionan di ley di LTU a pone un base pa tin un supervision electronico cu ta consisti di un “ankle banchi” unda basicamente ta duna e persona un meldplicht cu e tin cu informa te ora yega su oportunidad pa wordo expulsa. E ora ey no tin nodi di wordo deteni pero por monitorea unda e persona ta. Esaki ta un di e innovacionnan cu a wordo poni den e ley cu a keda introduci e siman aki pa wordo aproba den Parlamento.
E dignatario a agrega cu tambe tin un base huridico aworaki pa e APIS (Advance Passenger Information System). Esaki ta un sistema cu ora cu un persona subi un avion prome cu e yega e destinacion Aruba, ya caba a base di APIS, Imigracion sa ken ta biniendo nos pais y si e lo wordo admiti of no.
Tur esaki ta avancenan tecnologico cu a wordo poni den e ley, Minister Bikker a acentua.
VERGUNNINGRECHTEN:
Otro sistema nobo cu tambe a keda introduci ta “Vergunningrechten” (derecho di permiso) pa forma un base mas proporcional pa inversionistanan cu ta bin establece na Aruba.
E mandatario a splica kico ta e idea tras di e cambio aki. El a indica cu un inversionista, actualmente, ta paga un average di 100 florin pa por haya un permiso pa bin establece na Aruba. Pa un suma di 100 florin e ta haya tambe entrada na Aruba su sistema di seguro general (AZV). Gobierno no ta kere cu esey ta proporcional.
“Si un inversionista cu tin manera mester contribui cu un schouder mas hancho. Nos ta pensa cu ta proporcional pa nos pidi e persona un tiki mas contribucion di su parti, y no e suma practicamente neglishable di 100 florin, cu ta masha poco pa e drenta den nos sistema di seguro general. Nos ta wak cu den otro paisnan nan ta pidi sumanan mas cuantioso, ora ta trata di inversionistanan cu kier bin establece nan mes na e pais. Nos a moderniza e sistema di retribucion den un dimension nobo, cu ta e Vergunningrechten”.
VREEMDELINGENKETEN:
Minister Bikker a informa cu tambe den e mesun ley a introduci un Advies Committee pa loke ta trata “Vreemdelingenketen” (cadena di stranhero) cu ta basicamente un comision cu ta bay tene reunionnan constante y duna conseho no solamente na minister pero na e diferente instancianan cu ta traha cu e cadena di stranhero, manera: DIMAS, Warda Nos Costa, IASA cu lo bira Imigracion Aruba den termino corto, como tambe Ministerio di Labor.
“Mi a sinti cu mester tin mas coordinacion entre e instancianan aki, y e comision a wordo institui den e cambionan cu a tuma lugar den LTU e siman aki”, Minister Bikker a reitera.
Esaki ta encera tambe un consulta permanente di e Vreemdelingenketen, y a pone un base regular pe, cu ta cay bao minimo dos ministerio, pa nan consulta constantemente cu otro.
