Home Editorial 2018: Crisis Humanitario ta mustra dede riba Nacionnan Uni

2018: Crisis Humanitario ta mustra dede riba Nacionnan Uni

121
0
SHARE
- Advertisement -

Editorial

2018 ta drenta historia como aña di drama humano. El a tipifica su mes pa e hecho cu aunke no tabata tin guera mundial abierto, hende a bira victima di gobiernonan y organisacionnan cu nunca nacionnan uni a logra controla.

Drama humano a haya un nomber nobo na un gran cantidad di pais, cu no conoce un gobierno democratico y a destrui poblacion di e pais na diferente forma. Tabata tin asesinato directo y morto a scapa disidentenan di martirio diario y e suerte di e gran mayoria di nan paisnan.

Gobernacion mundial a wordo saca for di balansa debi na e huida di refugiadonan cu mester a bandona tur posesion y dignidad humano pa trata na yega bou gran peliger na paisnan cu ta considera problema. Mientras e dolor humano ta wordo sinti dor di tur hende, ta sumamente dificil pa comunidadnan individual atende e situacion cu ta sigui escala.

Ta hustamente pa preveni e situacionnan aki a introduci dia 25 di april 2945 Nacionnan Uni na San Francisco. E meta principal di Nacionnan Uni ta pa mantene paz y siguridad internacional. Pa por alcansa esaki a instala e Conseho di Siguridad permanente forma pa Merca, Rusia, Gran Britania, China y Francia. Nan tur tin derecho di veto.

Otro miembronan ta ser eligi pa un periodo di dos aña y ta bini di e diferente continentenan.

E organisacion Nacionnan Uni a reemplasa otro organo similar cu no por a funciona. Si mira e situacion mundial actua, ta bin dilanti cu ta imposibel pa mundo conoce un instancia oficial cu ta haci su trabou directo. Si bay na e curason di problemanan, mester bisa cu e problema pa Nacionnan Uni cumpli cu su trabou ta su structura.

Awe mester analisa kico “mantene paz y siguridad internacional” mester encera pa por alcansa e meta principal cu ta bienestar di hende.

Pa por yega na paz y siguridad internacional, tur pais afilia mester ta obliga na mantene un base democratico, a base di un gobierno eligi den eleccionnan liber cu Nacionnan Uni mester supervisa.

E gobierno lider mester crea un construccion legal pa goberna a base di ley. E orden di ley mester preveni dictadura, opresion, destruccion di bienestar humano, na tur pais miembro. E esencia di Nacionnan Uni mester keda e alma democratico di derecho humano.

Pa un pais por ta parti di Conseho di Siguridad, cu tin derecho di veto, e mester por ta un pais cu eleccion liber, un gobierno eligi dor di pueblo cu participacion liber di partidonan na eleccion. Esaki ta nifica cu paisnan comunista sigur no por ta den e conseho pasobra nan no ta honra principionan democratico.

E crisis humanitario actual a nace na paisnan dictatorial cu ta trapa riba derechonan humano manera Venezuela. E ta afecta siguridad di otro paisnan, cu Nacionnan Uni kier exigi encarga nan mes cu hende cu a bira victima di gobernantenan opresor.

Nacionnan Uni tin e tarea di haci husticia. Nacionnan Uni mester tene na normanan di bon y malo pa garantisa bienestar di hende.

Na 2018 Nacionnan Uni a bandona nan tarea principal y di otro banda kier a tene paisnan responsabel pa situacionnan cu ta ser crea dor di paisnan cu no ta respeta ni tratado, ni hende ni Nacionnan Uni mes.

Pa Aruba loke ta pasa na Venezuela ta ehempel di e problema di refugiadonan. Un dictador a destrui un pais y su hendenan. Ki dia Nacionnan Uni a exigi Venezuela duna cuenta y rason di loke e ta haci?

Rusia y China cu ta den e Conseho di Siguridad, lo permiti Nacionnan Uni actua contra Presidente Nicolas Maduro? Si nan haci esaki, Nacionnan Uni mester actua contra nan tambe.

Si Segunda Guera Mundial a bira resultado di debilidad den e formula pa paz cu a alcansa despues di Prome Guera Mundial, e guera friu cu ta culmina atrobe awe hunto cu e ambicion pa poder, ta duna muestra cu Nacionnan Uni no tin e capacidad ni poder pa trece cambio pa miho na mundo.

Nacionnan Uni tin e poder pa papia y discuti, pero e no tin poder pa actua. Si esey tabata e caso 2018 lo no a bira otro aña mas di refugiado, victima di e silencio di Nacionnan Uni cu kier pa paisnan manera Aruba tene su mes na regla, cu e mes no ta honra.

Ta di spera cu na 2019 mundo tin e madurez pa atende e alma di Nacionnan Uni cu a perde su balor mas importante na 2018.

- Advertisement -

DUNA COMENTARIO

Please enter your comment!
Please enter your name here