ORANJESTAD (AAN): Bon noticia a drenta for di Hulanda! E hoben di Aruba, Bjorn Hart, ta demostra con cu disciplina y perseverancia bo por logra bo soño.
Na un edad relativamente hoben Bjorn a bay Hulanda cu su mayornan pa miho bienestar pa su futuro. Na un edad hoben di 6 aña manera mayoria mucha lo cuminsa hunga futbol y el a keda practica deporte te awe.
Bjorn a dedica su bida na Hulanda pa tanto studia y practica su deporte locual cu e ta gusta. Bjorn a sali pa varios biaha Most Valuable Player di su ekipo. Como un hoben sordo Bjorn no a laga esey tabata un obstaculo pa su desaroyo. Banda di practica su deporte cu e ta stima el a dedica pa termina su estudio y ta laborando. Pa un hoben cu no ta scucha sigur mester haci extra sacrificio pa asina logra tur bo deseo nan.
Na edad di 18 aña Bjorn a worde selecciona pa hunga den seleccion di futbol Hulandes cu a participa e tempo ey den campeonato Europeo na Dinamarca.
Despues Bjorn a keda activo den seleccion di veld voetbal Hulandes y a hunga wega nan di clasificacion pa campeonato Europeo cu ta tuma lugar otro aña.
E ta activo den veld y zaalvoetbal.
Algun tempo pasa e a worde acerka pa e trenador di ekipo di zaalvoetbal di Hulanda pa cuminsa train cu e seleccion el a demostra su talento den e seleccion hungando zaalvoetbal. Pues asina a cuminsa hunga den seleccion di Hulanda pa wega nan di clasificacion y Hulanda a logra clasifica pa campeonato Europeo despues di hunga ultimo weganan na TEL AVIV na Israel.
E siman aki Bjorn ta biahando pa Finland pa bay hunga campeonato Europeo cu ta tuma lugar di 5-15 december. DIARIO ta kier desea Bjorn Hart den ekipo Hulandes tur clase di exito.
