Home Policial Ciclista Chaim De L’Isle a fayece 48 ora despues di sufri accident

Ciclista Chaim De L’Isle a fayece 48 ora despues di sufri accident

3893
0
SHARE
— Chaim De L'Isle (cortesia: Facebook).
- Advertisement -

ORANJESTAD (AAN): Tur atardi e hoben Chaim De L’Isle ta haci ehercicio, coriendo rond Aruba practicando su deporte favorito di Ciclismo.  E ta su pasion, su orguyo, y sigur su mision den bida pa progresa den esaki.

Pero malasuerte a acompañe Diabierna dia 28 di December 2018.  Alrededor di 4:35 pm, un unidad di Polis cu tabata pasando eybanda a bin topa cu un accident riba e cruzada di Irausquin Boulevard y Caya Punto Brabo.  Mesora a notifica Central di Polis di e dalmento aki na altura di cruzada di Alhambra.

Nan a bin haya e ciclista benta abao mey-mey di yerba net despues di e cruzada.  Nan a mira cu un auto Mitsubishi tipo coupe a dal e ciclista coriendo su bicicleta Trek.  E ciclista a bay dal cu su cabez den windshield banda robez, kibra e spiel banda robez, y finalmente bay halto y cay riba e berm.

E golpi contra e windshield tabata fuerte!  Debi na esey e ciclista a ricibi trauma na su cabez, y tabatin un cap tambe cu ta sangrando.  Mesora Polis a solicita Ambulans cu maximo urgencia.

Testigonan a bisa cu e ciclista a bay pasa over di e cruzada, pero tin indicacion cu e ciclista tabata coriendo bicicleta den verboden.  Kizas e no a realiza cu e Mitsubishi cu stuurwiel na banda drechi tabata acercando cu velocidad asina halto. Ora cu Polis a bay check e Mitsubishi color cora, nan a bin constata cu ningun documento ta cuadra cu e vehiculo.  E number di auto poni riba e vehiculo no ta cuadra.  E no tin keuringskaart, no tin aseguro tampoco.  Esaki ta bira un problema grandi pa e chauffeur, kende aparentemente ta un persona cu ta spuit auto.  El a bisa Polis cu el a djis sali un rato cu e auto sin documento aki pa haci respondi.

Un medico cu pa casualidad a pasa eybanda, a baha y duna un man pa atende e ciclista cu a keda benta eybao den posicion fetal.  Solo tabata dal den su curpa eybao, y algun voluntario a hisa pida paña pa asina tapa esaki di dje.  Esaki ta pa reduci calor y cayente riba su curpa, y minimaliza sangramento.

Dado momento a cuminza ripara cu Ambulans ta tardando, y e medico aki tambe a solicita pa Ambulans bin mas urgente, debi cu e pacient aki urgentemente tin di wordo atendi na Hospital.

DIARIO a haya sa cu net e momento ey unidadnan di Ambulans ta basta ocupa.  Ironia ta cu e entrada di Servicio di Emergencia na Hospital ta apenas 630 meter leu.

Finalmente Ambulans a yega, y mesora Paramediconan a pone riba stretcher y a sali cune pa Hospital.  Aki a opta pa mesora pone den Unidad di Cuido Intensivo, bao vigilancia di dos docter.  Su condicion tabata hopi delicado mes.

E ciclista a wordo identifica como Chaim De L’Isle di 21 aña di edad.  Pa colmo su mayornan ta den exterior cu vacacion.  A tarda un tiki pa por a localiza su tata, y ora cu a haya e noticia, mesora nan a bula bek pa Aruba pa asina Diasabra a yega y ta hunto cu nan yiu.

Diasabra mainta despues di 24 ora, keto bay e situacion di e ciclista a keda critico.  Pero e tabata constant bao vigilancia di Docter y un Neurologo.

Pero su situacion no a mustra mehoramento, y Diadomingo madruga ora apenas el a caba di cumpli 48 ora di accident, el a hala su ultimo rosea.

Vocero di Polis a confirma, cu Diadomingo pa 4:37 am, Dr. Utterbeeck a constata morto di Chaim Anthony Marius De L’Isle, naci na Aruba dia 16 di December 1997, pues tin 21 aña di edad.

El a bira e di 10 morto di trafico pa 2018.  DIARIO hunto cu Cuerpo Policial ta manda su mas profundo palabranan di condolencia na famia di Chaim.

- Advertisement -

DUNA COMENTARIO

Please enter your comment!
Please enter your name here