Home Parlamento Demanda a crece pa ayudo di desayuno diariamente na scol

Demanda a crece pa ayudo di desayuno diariamente na scol

22
0
SHARE
- Advertisement -

Parlamentario Sue-Ann Ras (MEP): for di 600 pa 1000 mucha

RANJESTAD (AAN):   Durante tratamento di presupuesto di Minister di Asuntonan Social y Laboral tabatin varios pregunta a bin dilanti di Parlamentario Sue-Ann Ras (MEP). Un di e puntonan di atencion tabata tocante desayuno pa nos mucha- y hobennan na scol.

E problemanan social y nos ta na altura di nan y ta purbando awo di soluciona, claro te unda cu por tambe, mirando cu pa hopi aña a neglisha henter e tereno social. Sin embargo responsabilidad primordial di lantamento di un yiu, ta keda di e mama y tata.

“Imagina bo, cu den 1 aña di tempo e demanda a crece for di 600 pa alrededor di 1000 mucha, cu ta hayando ayudo di desayuno diariamente na nos scolnan. Mi pregunta tabata, si minister ta bay haci un investigacion tocante e situacion aki, ya cu di experiencia mi por bisa si, cu cada caso ta diferente y bo tin 3 opcion. E prome ta, cu realmente e situacion ta dificil na cas y no tin recurso pa brinda e muchanan un desayuno mainta. E di dos ta cu ta pa falta di tempo y/of conocemento di e mayornan, tocante kico por haci como desayuno mainta. Y di tres ta cu ta djis negligencia y conscientemente no ta hacie, paso e mayornan sa, cu e muchanan ta haya desayuno na scol toch, ya cu nan ta den e programa of e maestro mes ta percura pa esaki,” Ras a indica.

Segun Ras, ora bay bek den historia di e fundacion, cu a cuminsa na 2001 cu 138 mucha, ta preocupante y alarmante pa wak con den transcurso di 17 aña a crece cu rond di 800%…cual ta demasiado!!! Fundacion Ban Uni Man Pa Cria Nos Muchanan di John Fun cu cooperacion di hospital ta duna e muchanan di menos recurso un desayuno, cu ta consisti di un sandwich y algo di bebe diario na scol.

Aña pasa e fundacion tabatin 800 mucha, pero pa motibo cu e gastonan a subi y e sponsornan no tabata hopi, nan mester a tuma cierto decision fastioso, ya cu e reservanan a cuminsa baha y mester a baha e cantidad. Asina mes nan a haci nan maximo pa bah’e te na 600 so, paso realidad tabata cu mester a baha esaki te 500.

“Fundacion Ban Uni Man Pa Cria Nos Muchanan ta yuda 52 scol rond Aruba; di San Nicolas te Noord. Y sigur mester haya sosten di comercio como tambe gobierno. Mi ta keda enfatisa cu desayuno ta di sumo importancia y mi sa tambe cu e situacion ta dificil pa hopi famia. Pero nos mester percura si, pa nos mucha- y hobennan ta bon alimenta mainta, ya cu su prestacion na scol ta depende di esaki. P’esey ta importante pa analisa e situacion den profundidad y asina bin cu solucion responsabel y duradero,” Ras a finalisa bisando.

 

 

- Advertisement -

DUNA COMENTARIO

Please enter your comment!
Please enter your name here