Home General Diabierna awor tin charla cu enfoke riba personanan cu limitacion fisico

Diabierna awor tin charla cu enfoke riba personanan cu limitacion fisico

31
0
SHARE
- Advertisement -

“Mi Wiel tambe ta conta!”

ORANJESTAD  (AAN): Diabierna awor ta tuma luga un seminario cu e titulo “Mi Wiel tambe ta conta!”, dedica na defunto Jozef “Jos” Solagnier. E seminario ta enfoca riba leynan cu mester regla espacio special a personanan cu limitacion fisico por parkeer. Ta rekeri leynan adicional cu mester pasa den Parlamento pa brinda mas accesibilidad na esunnan cu limitacion.

Den esaki hopi biaha ingenieronan no ta tene suficiente cuenta ora construi edificionan nobo, pa parkeerplaats pa e grupo special aki cu no por mobilisa facil.

Algun tempo pasa, Jos Solagnier a acerca miembro di Parlamento, Robert Candelaria, puntrando si e por skirbi un carta p’e relaciona cu e mesun topico aki. For di eynan a cuminsa e trabounan pa mira kico ta e leynan existente, e maneho existente y kico nos lo por aplica for di den Reino Hulandes mes.

A descubri mesora cu tabata falta hopi informacion. Por ehempel no tin un centro cu tur informacion na man di cuanto persona cu limitacion fisico nos tin na Aruba, specialmente adultonan cu ta participa den trafico. Tampoco a nota un maneho coherente den cual autoridadnan ta envolvi den otorgamento di un permiso pa parkeer na sitionan asigna pa invalidonan. Riba dje, a cera conoci cu e tristo realidad, cu den henter centro di ciudad, ta solamente 10 espacio pa parkeer pa invalido so tin!

A cera cabes hunto cu ADIAA (Asociacion di Ingeniero y Arkitectonan Arubano) y Alton Paas Foundation di Corsou. E ultimo aki ta un organisacion boluntario funda na aña 2012 dor di e mesun Alton Paas, un hoben di 21 aña e tempo ey cu a hay’e cu un reto fisico cu a limita su forma di move.

El a haya su mes envolvi den un accidente di auto despues di un problema cu curason cu a lag’e invalido. Di eynan el a cera conoci cu e limitacionnan na Corsou pa hendenan manera e, cu limitacion fisico, pa por move liber na luganan publico. Banda di traha na su mesun recuperacion, el a haci’e un trabou pa e lucha pa mehora e condicionnan pa otro ciudadanonan mescos cune.

Asina a pidi’e sosten tambe pa e duna un man cu idea y su experiencia pa uza aki na Aruba, unda tambe e oportunidad pa hendenan cu limitacion ta masha scars. Un di e partnernan den e evento ta e organisacion ADIAA cu tin un lista di ideanan con pa inclui nos ciudadanonan cu limitacion den condicionnan ora otorga un permiso di construccion di edificionan publico.

Awor aki hopi biaha sa tene cuenta cune, pero e no ta un condicion mara na ley. Consecuentemente tin desaroyado cu ta tene cuenta cu e aspecto aki, mientras cu otronan, kisas pa mantene e gastonan mas abou posibel, ta opta pa laga e opcionnan aki for di e plannan di construccion.

Durante e charla di diabierna awor, e grupo lo presenta un peticion special na Minister Andin Bikker di Husticia pa reenforsa leynan existente y pa inclui maneho pa ciudadanonan cu limitacion den su maneho.

Tin diferente charla durante diabierna mainta den Renaissance Convention Center. E prome ta cuminsa 9:30am dedica na aspectonan tecnico, specialmente pa ingenieronan y arkitectonan. E di dos sesion ta 10:30am dedica na publico general, den unda lo repasa e oportunidadnan cu por tin si adapta leynan y maneho existente pa ciudadanonan cu limitacion fisico. Ambos seminario ta gratis.

 

- Advertisement -

DUNA COMENTARIO

Please enter your comment!
Please enter your name here