Home Hudicial Diahuebs sentencia ta cay pa sospechoso di a abusa di dos yiu...

Diahuebs sentencia ta cay pa sospechoso di a abusa di dos yiu muher di Reginald Danies

802
0
SHARE
- Advertisement -

Fiscal a pidi pa declara e sospechoso liber

ORANJESTAD (AAN): Luna pasa tratamento di e caso a tuma lugar caminda Hues a bay hopi largo pa analisa tur e puntonan. Na final Fiscal a bisa cu e no ta haya cu tin prueba di sosten sino solamente declaracion di e muchanan. El a pidi Hues pa declara e sospechoso homber T. liber.

Tata di e muchanan, esta Reginald Danies no por a wanta mas y ora abogado mr. Lejuez tabata hiba defensa, el a menaza e abogado. El a wordo saca for di edificio di Corte y mr. Lejuez a haci denuncia di menaza na Ministerio Publico y na Polis.

    SOSPECHOSO DESMENTI:

   Luna pasa ora di trata e caso, Fiscal a bisa Hues cu e acusacion contra e sospechoso di inicial T. ta cu entre Juli 2013 y Augustus 2015, el a haci actonan inmoral cu dos mucha muher menor di edad. Hues a puntra e sospechoso e sospechoso T. (57), kico e tin di bisa di e acusacionnan. e sospechoso T. ta para riba cu e no a haci’e.

    HOPI BRUHAMENTO:

Hues a repasa un serie di procesverbaal di declaracionnan y Hues mes diferente biaha tabata mustra cu tin bruhamento pasobra un ta bisa algo y un otro ta bisa otro.

Mama J.Q. di e muchanan a haci denuncia na 2015, cu dos aña pasa na 2013 e tabata biba na cas di su abuela y ora a bende e cas el a bay biba na cas di su tanta cu ta casa cu e sospechoso T. Hues a remarca cu e tanta ta bisa cu ta na Mei 2012 nan a bay biba eynan y no 2013.

Tambe Hues a mustra riba declaracion di e muchanan victima R. y Z. E ruman Z., a bisa Polis durante interogacion cu e sospechoso T. a abusa di su ruman muher R.

Segun Z., e ruman R. a cont’e cu ora nan tabata drumi, e sospechoso T. tabata drenta den e cuarto y mishi cun’e. Segun Z., tres biaha e sospechoso T. a mishi cu R. Esey ta loke R. lo a conta Z.

Na Maart 2018 a bolbe scucha Z. Psycologo a hiba Z. Polis pasobra e tabata trata Z. y ta haya cu Z. no a conta tur cos. Segun Z., el a bisa cu e sospechoso T. lo a mishi cu su ruman pero e sospechoso T. a mishi cun’e tambe. Segun Z. na dos occasion e sospechoso T. a mishi cun’e.

Hues a puntra e sospechoso T. kico e tin di bisa di e declaracionnan aki. e sospechoso T. a keda para riba cu e no a haci nada. For di e declaracionnan di e muchanan por conclui cu e sospechoso T. tabata mishi cu nan riba nan paña na nan pecho y nan parti intimo. Tambe cu e sospechoso T. lo a pidi R. pa chupa su parti intimo. E victima R. lo a bisa tambe cu e sospechoso T. tabata dun’e placa y lo a priminti un cellular I Phone pa e no bisa nada.

Hues a lesa mas declaracionnan caminda personanan ta declara cu nan tambe tabata victima di e sospechoso T.

    PEDOFIL OF NO?

Entre e declaracionnan cu Hues a lesa tabata esun di tata di e muchanan, Reginald Danies, kende a bisa Polis cu e ta sospecha cu e homber T. lo ta pedofil pasobra den pasado e lo a mira e sospechoso T. ta haci cosnan sospechoso cu un mucha den laman.

Segun Reginald a sigui bisa, e sospechoso T. ta bebe hopi. Hues a puntra e sospechoso T. riba esaki y el a desmenti esey. El a bisa cu e ta dal drinks pero no hopi.

    FISCAL A PIDI LAGA LIBERTAD:

Fiscal a bisa Hues cu for di tur e investigacion tin pruebanan contra e sospechoso y tambe tin pruebanan na fabor di e sospechoso. Fiscal a mustra cu den casonan asina mester tin pruebanan di sosten y den e caso aki ta declaracion di e mucha so tin y no tin mas pruebanan cu ta mustra cu e sospechoso a abusa di e mucha. Fiscal a pidi Hues pa declara e sospechoso T. liber.

Abogado mr. Lejuez a bisa Hues cu e ta haya cu tin hopi duda den e caso aki y e tambe ta haya cu no tin suficiente prueba contra su cliente y cu mester declar’e liber. Hues a bisa cu e ta bay studia e caso y awe tin sentencia.

DIARIO lo informa lectornan kico tur a sosode den sala di Corte.

 

- Advertisement -

DUNA COMENTARIO

Please enter your comment!
Please enter your name here