Home Impuesto DIMP ta admiti cu nan ta hayando hopi yamada di ciudadanonan exigiendo...

DIMP ta admiti cu nan ta hayando hopi yamada di ciudadanonan exigiendo nan Restitucion

356
0
SHARE
- Advertisement -

ORANJESTAD (AAN): Desde luna di Juni caba, hopi ciudadano a haya e envelop blanco na nan cas, procedente di DIMP.  E ta indica cu nan tin di haya placa bek di demasiado belasting paga durante 2014.

Hopi di e hendenan aki ta clientenan di DIMP cu no tin ningun otro debe mas.

Pesey nan no por compronde di ya caba December a yega, y ainda nan no ta hayando Restitucion.  Esey a pone cu rumor a cuminza circula cu Ministro Xiomara Ruiz-Maduro mes a duna ordo pa stop cu pagonan di Restitucion.

E siman aki, vocero di DIMP mes a admiti cu enberdad ta hopi cliente ta yamando DIMP y puntra ki dia nan ta haya placa bek.  E contesta inmediato no por a wordo haya.  DIMP no a ni confirma tampoco si acaso ta Ministro mes a duna paro pa pago di Restitucion.

Sinembargo DIMP aparentemente a splica cu nan “trabao principal” (core work) ta cobra belasting.  Pues ‘restitucion’ no tin asina hopi urgencia poni su tras.

Segun DIMP, despues cu un persona a entrega su Aangifte Biljet, esaki ta worde pasa pa seccion cu yama “Data Entry”.  Aki ta hinca den computer tur cifra digitalmente di loke e persona a declara riba su Aangiftebiljet.

DIMP tin software unda e proceso di Aanslag-Regeling ta socede automaticamente.  E software aki mes ta analiza e entrada, gasto, y pago di belasting di cada persona, y na final ta genera un cobranza pa DIMP manda pa e cliente.

Aki e “cobranza” por ta sea exigencia pa mas pago, of e por ta cu ta debolbe placa bek tambe (restitucion).  Na Aruba, un persona por haya placa bek (restitucion) si acaso el a paga di mas na loonbelasting, of a paga riba voorlopige aanslag caba.

Pero no ta 100% tur carta imprimi door di computernan di DIMP ta wordo manda pa clientenan.  Varios di e cobranzanan aki ta keda aden, pasobra nan tin di wordo revisa door di un experto di DIMP.

Pues un parti di e cartanan ta wordo poni un banda pa e funcionario experto revisa kico ta e detayenan, pakico e sistema no a regla e aanslag.

Tin diferente checkpoints den e sistema di DIMP cu ta hala atencion di un experto pa check esaki manualmente.  E datonan ta wordo procesa digital, pero cu vigilancia den algun caso di un experto.

Unavez cu e cliente haya e carta di Restitucion via post, a sali na cla cu cada biaha hendenan ta yama DIMP pa cuminza puntra ki dia ta haya placa bek.  Esey ta loke ta pasando.  DIMP sa cu tin hopi hende hayando nan carta, pero ainda no a ricibi e placa.  Ni kier a splica di con hendenan cu a haya e carta di Juni, Juli, Augustus caba… ainda no a ni mira ni 5 cent bek.

Segun DIMP, e parti di Restitucion ta bay via otro proceso.  Aki DIMP ta admiti cu nan meta principal ta saca cobranza y tene control.

Pues por deduci cu Restitucion ta cana hopi slow mes, y esey ta bin debi cu tin di bay check prome si e persona tin otro debe habri, e.o. erfpacht of grondbelasting pa kite mesora di e Restitucion.

Di con ainda DIMP no a desaroya un Software automatico pa esey, y di con ainda hendenan di Juni ta wardando nan placa bek… no ta conoci.

 

 

- Advertisement -

DUNA COMENTARIO

Please enter your comment!
Please enter your name here