Home Hudicial Dos aña di prison exigi pa Curasoleño sospecha di tabatin mas cu...

Dos aña di prison exigi pa Curasoleño sospecha di tabatin mas cu 1 kilo di cocaina y pistol 9mm cu balanan

302
0
SHARE
- Advertisement -

E siman aki sentencia ta cay

ORANJESTAD (AAN): E homber J.K. di Curacao biba na Hulanda, aunke e ta para riba cu e no sa nada di e droga y mucho menos di e arma di candela, a scucha Fiscal exigi 2 aña di prison. Hues a bisa cu e siman aki por spera sentencia.

    ACUSACION:

E caso aki a bin dilanti na October 2018 caminda el a keda posponi y recien a keda trata. E acusacion cu Fiscal a presenta den Corte contra J.K. ta cu riba 17 Juni 2018 e tabatin 1.115 gram di cocaina y un pistol 9 mm cu 9 bala.

DROGA Y ARMA:

Segun J.K. e ta inocente. El a bisa cu e ta musico y el a bay keda serca un persona y den e camber a haya droga. E arma a wordo poni den su maleta. Segun J.K. el a laga su pañanan eynan y a bay keda serca su amiga. El a haya yamada di e homber D., puntra si e ta na e cas. J.K. a bis’e cu no. E ora ey D. a bisa cu tin un tal Chamo ta kedando den e camber y cu Chamo lo bay coy cos y laga cos den e camber. Segun J.K., el a solamente laga su pañanan eynan y tabata keda drumi serca su amiga.

Segun J.K. el a keda den un camber cu tabatin cahanan aden, dos saco, pañanan di hende. El a bisa Hues cu apenas e tabatin dos dia na Aruba. El a bisa cu Polis no a bis’e unda a haya e droga. E dia ey, el a habri su maleta riba su cama pa e pone su cosnan pa e bay for di eynan. Ta asina cu Polis a bay haci investigacion na e cas aki y a haya un arma di candela den su maleta y droga banda di su cama. Segun J.K. e no sa nada di arma. El a bisa Hues cu ta un hende a pone e arma den su maleta. E ta kere ta e Chamo of D. E no sa kende ta Chamo. J.K. a bisa Hues cu el a bay habri porta pa Polis y si e tabatin droga y arma, e lo a bay sconde esakinan promer cu el a bay habri porta.

    LOTE DI DROGA:

Hues a mustra cu segun e relato di Polis, dia 17 di Juni 2018 a haya 100 kilo di droga na altura Natural Bridge. E homber D. y un muher lo tabata eynan algun ora promer. Hues Comisario a duna permiso pa Polis bay haci investigacion na e cas di D., caminda J.K. tabata kedando.

J.K. a splica Hues cu despues cu a haya e arma, Polis a mustra e arma den un saco pero no a mustr’e unda a hay’e. E mester a bay sinta den sala mientras cu Polis a investiga den camber. El a sigui bisa cu Polis no a mustr’e e droga cu a haya. E arma tabata un 9 mm cu 9 bala den dje.

E droga cu a haya a pisa 1115 gram. Tabata 4 paki. Polis ta sospecha cu e 4 pakinan lo tabata pa hiba afor. A haya un corset di muher cu lo usa pa bisti pa sconde droga aden.

Hues a mustra cu J.K. su declaracion na Polis ta otro cu loke el a bisa den Corte. Na Polis el a bisa cu e ta kedando na D. y cu den e camber cu e tabata keda tabata keda un otro persona promer y tabata reboltea.

Ta asina cu Polis a detene D. promer cu a bay na e cas y D. a declara cu J.K. a pag’e 600 dollar pa keda den e camber. J.K. a hari mustrando cu no ta berdad. D. a bisa cu e no sa nada di droga y tampoco arma di candela.

    CONDENA CABA PA DROGA:

Hues a mustra cu J.K. tin carchi di castigo cu ta mustra cu el a haya condena na Bonaire, Curacao, Aruba y Hulanda pa droga. Segun J.K. esey ta pasado.

    EXIGENCIA DI FISCAL:

Fiscal a bisa cu 17 Juni 2018 a haya un lote di droga na Natural Bridge y esey tabata motibo bay haci investigacion na cas di D. Den e camber unda J.K. tabata keda a haya saco cu droga y arma di candela. Fiscal ta haya cu den e cas tabata haciendo preparacion pa exporta droga. E ta haya cu e droga ta di J.K. Fiscal a remarca cu no ta promer biaha cu J.K. a cay sera pa droga. E ta musicante y ta viaha rond y diferente biaha el a cay sera pa droga. Fiscal ta considera J.K. un residivista di droga. El a exigi 24 luna di prison, kitando e tempo cu J.K. ta sera. Fiscal tambe a exigi pa destrui e pistol cu bala y e droga. El a pidi Hues pa e 3 cellularnan keda confisca. Fiscal ta haya cu e cellularnan ta wordo usa pa papia di droga.

ABOGADO:

Abogado mr. Hart a bisa Hues cu tur cos a cuminsa ora cu Polis a haya un lote di marihuana y un lote di cocaina na Natural Bridge. A bay investiga e homber D. y a detene como sospechoso di e droganan. Despues el a wordo laga liber. Via un amigo, J.K. por laga pañanan na cas di D. Den un camber el a laga su cosnan pero den e camber tabatin mas cosnan.

Tabatin un Venezolano “Chamo” tambe ta keda den e camber. D. a yama J.K. cu e Venezolano Chamo lo bay laga cos den e camber y coy cos. Durante investigacion den e camber, Polis a haya droga pero no a bisa na unda. Den e maleta di J.K. a haya un arma. Na September 2018, D. a wordo laga liber. E abogado a bisa Hues cu J.K. nunca a yega di wordo condena pa arma sino droga. Su ultimo condena tabata na 2012. El a remarca cu no a haya fingerprint di J.K. riba e arma. Polis no a haci investigacion pa saca afor di kende e arma lo ta. E abogado a conclui cu no por prueba legalmente y convicente cu e droganan y arma ta di J.K.

Hues a sera tratamento di e caso y a bisa cu e ta bay studia e caso y cu diabierna awor 14 December 2018 tin sentencia. DIARIO lo informa lectornan di e sentencia aki.

- Advertisement -

DUNA COMENTARIO

Please enter your comment!
Please enter your name here