Home Editorial Editorial: Aruba mester uni enfrente peliger comunista den region

Editorial: Aruba mester uni enfrente peliger comunista den region

60
0
SHARE
- Advertisement -

2018 a pone DIARIO den un estado di alerta mientras e regimen di Nicolas Maduro tabata origen di problemanan creciente pa mundo. Kico por pasa cu un pasa y kico ta pasa cu e region y mundo henter, casi a ser lubida na e continente Mericano te na e momento cu un Cuba nobo a surgi di Chavismo.

Poco atencion tabata tin pa loke realmente tabata sosode na Venezuela, te na momento cu tur disfraz a cay y a haci bofon di e supuesto medidanan cu mundo tin pa por garantisa paz mundial y evita horor humano.

Na 2018,  solo a huy den e panorama cu a presenta su mes na Venezuela. Un grupo grandi di Venezolanonan mester a sigui e ehempel di Simon Bolivar y bandona nan pais ora e yugo dictatorial di Nicolas Maduro a aplasta democracia den eleccion. E resultado no tabata unicamente pa Venezuela.

Problemanan a cuminsa alcansa costa di Aruba ora Venezolanonan mester a trata di saca nan placa for di e pais pero tambe busca un cas nobo pafo di Venezuela. Un grupo a yega como turista, a lanta nan placa for di banconan y a bandona Aruba.

Otro grupo a haci uzo di transportacion peligroso pa na forma clandestino yega costa di Aruba. Siguridad nacional a ser directamente afecta y Aruba no solamente mester a busca recurso, pero mester a biba tambe cu e peligernan cu e situacion a crea.

Tabata conoci cu e regimen Maduro, mescos cu e tempo Cuba a haci, a kita bista di servicio di inteligencia di paisnan pa asina laga su hendenan yega otro pais como refugiado.

Den e epoca cu regimen Maduro a pone e base pa inclusion di Venezuela den e grupo di paisnan comunista activo na America Latino,  gobierno anterior di Aruba a firma un acuerdo pa e compania Venezolano den cual Rusia a haya representacion, bin habri e refineria di Aruba. Esaki a bira un laso directo entre Aruba y Venezuela na momento cu mundo liber a opone e     regimen di Maduro abiertamente.

Na e momentonan aki Presidente Nicolas Maduro ta prepara su mes pa un termino nobo di eleccion cu mundo liber no ta acepta debi na e forma con eleccion a tuma luga.

Union Europeo a prolonga su sancion contra Venezuela y a anuncia medida pisa. Merca ta sigui cu su medidanan. Paisnan den vecindario di Venezuela manera Colombia y Rusia ta den tension grandi.

E cantidad di refugiadonan ta aumenta. Venezolanonan desespera cu no tin cuminda ni remedi na e pais completamente destrui ta sigui huy di nan cas pa scapa di e teror comunista.

Un guera friu a haya inicio dilanti porta di Aruba cu tin tur motibo pa teme pa su siguridad.

Na November 2018 Hulanda a pidi Union Europeo pa tene islanan ABC na consideracion den nan planificacion mientras e relacion entre Venezuela y Rusia tabata bira mas estrecho.

Mientras Aruba ta prepara pa dianan di fiesta, un base militar Ruso na Venezuela ta den creacion dilanti costa Venezolano.

Ta deber di DIARIO pa pidi Gobierno local pa hunto cu Reino expone e situacion actual di Aruba na pueblo. Splica pueblo e situacion pa asina nos prepara nos mes tambe pa asumi nos responsabilidad como ciudadano.

Pueblo por yuda Gobierno y autoridad actua contra e factor di insiguridad dor di no colabora cu entrada ilegal, cu por ta parti di e problema di refugiado pero tambe di infiltracion di personanan peligroso.

Pueblo por yuda autoridad den vigilancia necesario na e pais. Pueblo por yuda reduci incidentenan cu lo afecta turismo, nos unico pilar economico.  Nos kier invita Gobierno pa duna pueblo splicacion di e situacion actual pa asina nos por drenta dianan di fiesta consciente di un realidad, cu ta un responsabilidad pa nos tur.

 

 

- Advertisement -

DUNA COMENTARIO

Please enter your comment!
Please enter your name here