Home Editorial Editorial: AVP no tin cuero di cara

Editorial: AVP no tin cuero di cara

385
0
SHARE
- Advertisement -

For di siman pasa Parlamento ta trata e presupuesto di Aruba. Por a spera cu e coro di AVP lo a haci uzo di e momento pa publicamente expresa un “mea culpa” y bati riba su pecho pa pidi Aruba pordon.

E cifranan cu Parlamento di Aruba a trata ta duna prueba di e situacion di desesperacion cu AVP a causa e pais durante e tempo cu e partido berde a abusa di confiansa di pueblo. Den e  presentacion di cifranan, pueblo a haya confirmacion di e forma cu AVP a trata di destrui futuro di Aruba.

E momento a yega pa AVP baha for di su tram di fantasia y admiti con el a trata di kibra futuro di Aruba.  E mester presenta su disculpa na Aruba pa e forma cu el a trata di deshaci di tur speransa pa futuro di e pais, cu el a laga na ruina.

Na inicio di e reunion di Parlamento pa trata e presupuesto 2019, DIARIO a informa pueblo di Aruba di e diferencia grandi entre e maneho descabeya di gobierno di AVP y e maneho di gabinete Wever-Croes.

Nos ta papia cu cifra y hecho pa splica pueblo e berdad y asina evita cu politiconan di AVP duna continuacion na e unico arte cu nan conoce, cu ta presenta mentira na pueblo pa asina nan bolbe den gobierno pa crea mas caos pa e pais.

E record cu AVP a crea den gobernacion ta e debe nacional y e forma cu e tabata sa di uza fondonan di pueblo contra tur regla di bon gobernacion. Rapportnan, consehonan cu AVP a pisotea pa e por a sigui su racha destructor den gobierno durante ocho aña, ta papia palabra cla.

Proyectonan cu riesgo enorme pa e pais Aruba, a ser fabrica dor di e pio gobierno cu Aruba a conoce, cu ta e Gobierno Mike Eman manera historia skirbi di e pais ta demostra.

E presupuesto di crisis cu Aruba mester a atende ta resultado di e abuso cu gobierno di AVP a comete contra Aruba. Un total di un Biyon Florin a ser otorga na proyectonan cu organonan oficial a pidi gobierno di AVP splica, pero cu AVP a nenga di splica dilanti e organo mas halto di Aruba.

AVP no por tin cuero di cara si ainda exponentenan di AVP kier a hunga wega barata. Un wega mas barata cu e wega cu el a hunga cu pueblo, ora el a bay cera un contracto cu un compania di e gobierno di Nicolas Maduro cu Rusia tras di escenario. AVP a yena pueblo cu speransa falso cu un proyecto cu e tabata sa cu lo fracasa y cu el a cubri cu cantidad di mentira.

Record AVP a kibra den gobernacion. Record, cu ta visibel den e dolor di Aruba na 2018 ora lider di AVP a bay sconde na green corridor pa bolbe sin presenta su disculpa na pueblo pa e desastre cu tabata su unico logro.

Awe Aruba ta biba cu e sufrimento cu e gobierno di AVP a laga como herencia.

E cifranan cu awor Parlamento di Aruba a trata ta testimonio di e hecho y realidad cu gobierno di AVP a kibra speransa pa futuro di Aruba y cu gobierno di AVP a abusa di confiansa di pueblo.

AVP no kier realisa cu wega a termina pa AVP, cu a crea e pio crisis cu Aruba a conoce y a haci bofon di Aruba y a pisotea e bienestar di Arubianonan.

 

- Advertisement -

DUNA COMENTARIO

Please enter your comment!
Please enter your name here