Home Editorial Editorial: Bon boluntad ta e luz di Pasco

Editorial: Bon boluntad ta e luz di Pasco

44
0
SHARE
- Advertisement -

Un siman mas falta pa Aruba uni den celebracion di Pasco 2018.  Nos ta acerca culminacion di un temporada, cu ta duna expresion na e sentimentonan y elementonan mas bunita di hende y su existencia.

Pasco ta invita nos pa sigui un strea, cu lo guia nos pa e luga caminda nos tur lo topa otro. Pa Cristiannan e ta e cuna di Cristo, fundeshi di e fe Cristian y celebracion di Pasco. Pa e parti di pueblo cu no ta Cristian, e temporada a bira ocasion pa uni den e bunitesa special di dianan cu ta conduci na fin di aña.

Na final di e calendario gregoriano, e ser humano ta expone su mes den e splendor di bon boluntad y e anhelo mas grandi di hende ta bini dilanti.

E felicidad di hende ta e punto central. Paz, harmonia, positivismo, luz, alegria, comparti posesion y dolor, ta e explosion sentimental di hende durante e temporada di Pasco.

Bida ta bira un celebracion den union cu ta ser crea den famia, organisacion, trabou, pais, mundo. Un ocasion ta wordo habri pa hende bira creativo den bunitesa di existencia humano.

Comunidad ta bandona su rutina diario pa entrega su mes na tradicion cu ta bira e guia pa yega na e sentido comunitario di un pais.

Comunidad ta uni den e temporada di Pasco pa ciudadanonan reconoce necesidad di otro y yuda otro cu necesidadnan basico manera alimento. Ta tene celebracionnan pa gruponan cu henter aña nos tin tendencia di neglisha.

Discursonan ta duna hende animo pa sigui cana pa dificil cu situacion por ta.

Temporada di Pasco ta habri caminda pa hende mira tur posibilidad cu bida ta ofrece nos ora nos ta di bon boluntad, cu no ta solamente un deseo.

Bon boluntad ta haci posibel pa nos acepta e necesidadnan di hende y asina hunto traha riba un comunidad di hende feliz.

E bon boluntad pa mama y tata lucha pa bienestar di e yiu cu ta nace y mester di formacion. Ta di e entrega di e mama y tata e ta depende na prome luga pa e por duna un contribucion valioso na su comunidad.

Su cuna por ta un pesebre den un cueba. Ta e amor y e respaldo cu e ta ricibi den e hogar caminda e ta crece, ta decisivo ora e mester scoge entre bon y malo.

E bon boluntad di dirigentenan di un comunidad mester ta un strea pa e por conta cu educacion na school, oportunidad pa desaroya su talentonan y e ambiente di inspiracion positivo a base di un macutu di balornan carga pa e bon ehempel.

E bon boluntad di tur sector di comunidad cu ta basa su mes riba su dignidad como hende y ta crea su bon boluntad pa duna respet na hende, autoridad, ley.

Nos ta prepara pa e ultimo fase di temporada di Pasco 2018. Un di e añanan mas importante den historia di Aruba ta yega na su fin.

Con feliz nos lo ta durante temporada di Pasco 2019, ta depende di nos bon boluntad pa durante henter aña nos duna expresion na e sentimentonan y elementonan mas bunita di hende y sigur di e Arubiano.

Laga nos awe uni den e culminacion di temporada di Pasco di goso y felicidad.

 

 

 

 

- Advertisement -

DUNA COMENTARIO

Please enter your comment!
Please enter your name here