Home Editorial Editorial: Democracia duradero y e lucha pa Aruba

Editorial: Democracia duradero y e lucha pa Aruba

62
0
SHARE
- Advertisement -

Na 2015 Nacionnan Uni a introduci un programa, den cual a resumi  e orden democratico mundial cu na 2030 lo mester produci un mundo transforma den cual e bienestar di hende lo ta central.

Na apertura di e ultimo siman prome cu dianan di fiesta lo uni Aruba den celebracionnan tradicional di acuerdo cu nos cultura, DIARIO ta culmina su esfuersonan durante 2018 pa yuda crea e sociedad renoba di Aruba.

Na momento cu e colegio mas halto y independiente den control financiero di e pais, Algemene Rekenkamer Aruba a bini dilanti siman pasa, DIARIO a reconoce presencia di e instrumento mas grandi cu Aruba mester pa por tin garantia di democracia, cu ta centralisa den e bienestar di hende y di e mundo cu mester ta bon pa hende por ta bon.

Algemene Rekenkamer Aruba a presenta e tema cu ta contene e motibo di existencia di democracia y a mustra riba e responsabilidad pa e tratado cu mundo a firma pa por atende asuntonan cu ta varia di libertad di pueblonan te e recuperacion di naturalesa afecta pa industrialisacion.

Ta e temanan aki ta central tambe den e programa di gobierno di 2018      “Hunto pa Aruba” cu DIARIO a sostene durante 2018.

E linea di maneho di e matutino di Pueblo di Aruba na 2018 tabata basa, riba recuperacion financiero, economico y social di e pais di acuerdo cu e principio democratico di nos constitucion, cu ta pone hende central.

Politica mester ta e instrumento pa felicidad di hende na un forma duradero, loke ta encera cu e sistema di maneho gubernamental di e pais no por ta dirigi riba bienestar di un grupo politico pero mester ta dirigi riba bienestar di e pueblo cu ta crea e fondonan financiero cu su produccion y su belasting pa e pais por funciona.

Bienestar di un pueblo no ta sigura ora proyectonan cu ta haci politiconan popular tin prioridad riba e desaroyo duradero di un pais.

Aruba a experiencia falta di desaroyo duradero den e maneho gubernamental durante ultimo añanan, cu tabata basa riba decisionnan iresponsabel ora tabata gasta placa di pueblo y a crea un debe nacional y un riu di interes cu ta deshaci di fondonan pa traha riba bienestar economico, comercial, social, nacional.

E siguridad di empleo y e nivel social cu trabou ta crea a ser kibra dor di e acuerdo pa rehabilita refineria cu a tranca buskeda di otro forma pa crea pilar nobo di economia for di 2014.

E maneho di DIARIO cu a respalda e forma con nos Woman of the Year, Evelyn Wever-Croes y Man of the Year Otmar Oduber  a duna contenido na “Hunto pa Aruba” , awe ta bin dilanti.

DIARIO no a duna sosten politico bashi pero a sostene un concepto acorda pa Nacionnan Uni, cu a dicidi cu comercio, sindicato, prensa, tur partner social mester uni cu Gobierno pa por yega na transformacion di nos pais, como parti di nos mundo.

E hende mester ta central segun nos Constitucion, segun Democracia y segun Leynan pues cu Algemene Rekenkamer Aruba como aparato mas halto di control mester defende.

Un aña sumamente importante pa Aruba ta cera pa hunto nos drenta un futuro cu mester hiba nos na un pais, un mundo, un universo di hende feliz.

DIARIO ta confirma su compromiso cu pueblo na final di un aña di reto pa sobrevivi y inicio di un aña cu mester habri porta pa bienestar duradero!

- Advertisement -

DUNA COMENTARIO

Please enter your comment!
Please enter your name here