Home Editorial Editorial: La Linda: simbolo di comercio Arubano

Editorial: La Linda: simbolo di comercio Arubano

232
0
SHARE
- Advertisement -

Den su edicion di ayera, DIARIO a presenta un informacion cu ta simbolo di e lucha tenaz cu nos ta hiba pa pidi atencion pa e problemanan grandi cu e alma comercial y economico di Aruba ta confronta.

Ta un hecho conoci, cu ora spierta pa peligro, hende y comunidad no ta comprende na prome instancia kico ta pasa. Ta na momento cu e peliger haya un cara, un nomber, un simbolo of pio ainda resultado desastroso, tur hende ta realisa kico ta pasa.

La Linda awe ta e simbolo di e realidad actual di comercio Arubano, cu durante e ultimo decada no a haya e guia y sosten cu e tabata merece. DIARIO a basa su mes riba hecho real Aruba y mundo, pa mustra riba tur faceta cu ta destrui e alma comercial Arubano y asina economia y nos comunidad.

Loke ta pasa cu Aruba awe, ta demostra cu politica no a tene cuenta cu necesidadnan di Aruba durante ultimo gobernacion cu a destaca su mes pa cantidad di proyecto sumamente costoso pero innecesario y hasta incomprendibel, cu no a yuda economia di Aruba pero hustamente a causa caida serio di Aruba.

Si tur e placa cu a ser gasta na Green Corridor, tram y otro proyectonan similar, a ser uza pa guia comercio y economia di Aruba na momentonan sumamente importante, e crisis cu Aruba ta conoce na e momentonan aki lo no a presenta.

Ariba cual realidad e maneho di e pais durante e ultimo gobernacion tabata basa, no ta conoci. Cu e no ta e realidad Arubano,  pero ta parce hasta di otro planeta, ta keda confirma awe cu e angustia di comercio local ta haya un imagen den La Linda.

Mientras e crisis tabata bira mas evidente na Aruba na 2018 ora e maneho di Gobierno anterior a rementa den man di Gobierno Wever-Croes, DIARIO a adverti pa tur e aspectonan cu informacion clave.

Paisnan rond mundo, cu excepcion di Aruba obviamente, for di 2010 a cuminsa prepara nan maneho pa cambionan grandi den mundo.

A base di estudionan profundo nan a haci investigacion di loke lo pasa ora tecnologia sigui avansa y kico por spera di economia ora tecnologia introduci cambionan sumamente importante.

Nos a presenta expectativanan den e era digital, e era di computer y internet y con mester adapta economia a base di estudionan cu paisnan cu a gosa di un gobierno responsabel for di 2010, a laga haci.

DIARIO a ofrece informacion con mester atende cu comercio, cu lo wordo afecta pa e cambionan den gerencia y demanda moderno.

Gobernacion anterior na ningun forma a prepara Aruba pa awe y esaki ta resulta den un situacion di agonia comercial cu no ta un simpel recesion manera ex Ministro Mike Eman ta pretende pero un situacion cu a ser crea dor di un debe y un fayo total di maneho economico cu e proyecto refineria y otro proyectonan. Placa no a ser inverti pa Aruba adapta na cambionan necesario.

DIARIO cu placer a tuma nota di e team multi disciplinario cu Gobierno actual a introduci pa asina Gobierno hunto cu partnernan social yega na transformacion pa futuro.

Mester bay asisti empresanan Arubano pa adapta nan mes na futuro directo ora un generacion nobo di gerencia, personal, consumidor ta e realidad di Aruba.

DIARIO a mustra cu ta 25 porciento di empresanan local rond mundo lo conoce traspaso di gerencia y surgimento di comercio online legal na cual mester yuda empresanan actual participa.

Nos a mustra na hopi ocasion con mester sigui ehempel di paisnan cu a atende e problema grandi di online ilegal cu no tin control di calidad, no ta somete na pago di belasting. Mercancia cu comercio local no por bende pasobra e tin fayo di fabrica ta drenta Aruba pa competi cu empresa local cu no ta prepara pa e traspaso historico comercial.

Nos ta bolbe haci un yamada na Gobierno actual pa duna prioridad na asistencia na e alma economico di Aruba cu ta empresa priva local, di cual La Linda ta simbolo.

Nos ta spera cu for di 2019 Aruba lo ser bendiciona cu guia responsabel pa reconstrui un pais cu un sector comercial sano ta garantisa futuro sano.

 

- Advertisement -

DUNA COMENTARIO

Please enter your comment!
Please enter your name here