Home Editorial Editorial: Reforma fiscal un sosten pa pueblo den crisis

Editorial: Reforma fiscal un sosten pa pueblo den crisis

94
0
SHARE
- Advertisement -

Na maart di 2018 Minister Presidente Evelyn Croes-Wever a presenta su mes na pueblo pa confirma e pakete di medida cu e pais mester a tuma pa por a confronta e crisis financiero severo. E gobernante a papia di un Aruba cu a spierta den e realidad inespera di e pais, cu un debe nacional enorme y un proyecto pa rehabilita refineria cu no a bira realidad.

E cifranan cu Gabinete Wever-Croes a hereda di gobierno anterior, no tabata cuadra cu e realidad cu Aruba tabata aden. Na momento cu a trata e presupuesto nobo pa 2018 na april, medidanan di austeridad tabata inclui pa refleha e berdadero situacion financiero di Aruba.

Pa Aruba no tabata facil biba cu e situacion cu hamas el a spera. Gobierno anterior a priminti cu na 2018 un mundo di maraviya lo a bira visibel na Aruba cu lo a conoce tambe reapertura di refineria.

Hamas Aruba por a pensa cu no ta un riu di abundancia e lo conoce na 2018 pero medidanan di austeridad pa pueblo paga e debe nacional inmenso cu tabata herencia di gobierno anterior.

2018 a bira un aña di crisis enorme pa Aruba. Un aña durante cual e mal maneho di parti di gobierno anterior a resulta den un responsabilidad financiero enorme pa ciudadanonan cu ta victima di iresponsabilidad gubernamental pasobra ta pueblo mester crea fondo pa paga pa mal maneho di pasado.

E crisis a cambia estilo di bida di Arubianonan cu mester a bandona nan creencia den e mundo di oro priminti pa gobierno anterior y acepta e medidanan cu gobierno Wever-Croes a implementa pa scapa futuro di Aruba.

Un di e promesanan di Minister Presidente Wever-Croes tabata, cu lo bin un reforma fiscal. Pa medio di cambio den belasting, lo a suavisa e peso di e medidanan pa pueblo.

Ayera porfin e resultado di trabou intenso di Gabinete Wever-Croes a bira conoci y Aruba a tuma nota di e sistema nobo di belastingnan personal como prome fase di e reforma fiscal.

Central den e maneho fiscal di gobierno actual por nota cu ta scrap pago di belasting pa e grupo mas debil debi na entrada y ta ahusta tarifanan na un forma cu e peso di belasting ta baha pa e grupo aki.

Gobierno a opta pa reduci e peso di belasting directo despues cu medidanan a aumenta e peso di belasting indirecto manera BBO, cu ta afecta poder di compra pero ta sumamente necesario pa genera entrada cu e pais mester pa paga e debe nacional y e interes envolvi y haya fondonan cu no a bira realidad pasobra e proyecto refineria no a cristalisa.

Esaki ta otro parti di e pakete total cu a ser presenta ayera na Aruba.

E comprension pa e situacion di cobradonan di pensioen di behes ta resalta. Ta trata di un grupo creciente, cu ta bandona e sector productivo debi na nan edad.

Reforma fiscal no a ser presenta como un ehercicio tuma sin preparacion debido, pero como un plan cu lo ser ehecuta den fase.

Aruba actualmente ta prepara atrobe pa tratamento di un presupuesto. E cifranan di e pais pa 2019 lo carga e emblema di e responsabilidad di e pais, pues e ciudadanonan, pa por cubri gastonan necesario y baha e debe nacional.

E hecho cu Gobierno Wever-Croes cu mester a implementa medidanan na april 2018 a presenta ayera e prome fase di e reforma fiscal, ta duna muestra di e responsabilidad di e gobierno pa yega na un bon maneho financiero pero tambe pa atende e problemanan cu ciudadanonan mester enfrenta.

DIARIO ta contento cu e maneho cu ta prueba di comprension pa e dolor di Pueblo di Aruba, cu a haya su mes confronta cu un realidad amargo na 2018.

- Advertisement -

DUNA COMENTARIO

Please enter your comment!
Please enter your name here