Home Economia Fecha 31 di December lo ta ultimo dia pa La Linda

Fecha 31 di December lo ta ultimo dia pa La Linda

5885
0
SHARE
— Mayoria hende ta corda La Linda cu su edificio principal full decora.
- Advertisement -

ORANJESTAD (AAN): Entrante 2019, e Caya Grandi na Playa cu tur hende tabata conoce, lo no ta e mescos mas.  Esey ta debi cu un di su “Anchor Store” mas grandi y conoci, lo habri Aña Nobo cu un borchi eterno di “Closed” riba e portanan.

E tienda di henter famia, “La Linda”, despues di 85 aña sirbiendo pueblo, lo cera su portanan pa semper riba Dialuna 31 di December venidero.

Esey segun informacion cu e propio empleadonan mes a cuminza duna siman pasa.  Esaki a socede despues cu nan a haya notificacion via abogado, cu e compania ta bay cera su portanan.

TIRANDO CULPA:

Y mesora tambe, hendenan cu tin costumber di apunta dede y tira culpa paki-paya, a cuminza haci esey tambe.

La Linda tabata e ultimo Department Store den caya grandi cu a keda existi, despues cu un monton di nan a cera nan portanan ultimo decadanan.  E estilo di negoshi unda hende ta drenta un solo negoshi pa haya tur cos pa famia cumpra, awor lo keda djis den memoria di pueblo.

Ya otro pacus manera Bon Bini Bazar, Shirley Store, Wulfsen & Wulfsen, Mansur Department Store, Toto’s, etc., ya a desaparece for di mapa di Caya Grandi.

E causa di e ciere?  Atrobe esnan cu ta apuntando dede, ta mustra cu e.o. e caida di La Linda ta bin debi (1) na e proyecto di Tram cu a kraak caya grandi.  Tambe tin cu ta apunta dede y ta culpa (2) mal maneho den e compania.  Otronan ta mustra riba e informe cu ta circula desde 2017 caba cu La Linda ta bay cera debi na (3) calidad inferior di mercancia.

 ORGUYO DI ARUBA:

Pero nos mester corda con grandi La Linda tabata, y con orguyoso pueblo ta di dje.  Tog e pensamento tristo cu La Linda tambe ta bay cera, ta indicativo cu e momento aki ta mas negoshi ta pasando den crisis economico.

La Linda tabata un pacus cu a keda cera merdia pa siesta.  Pero prome cu 2’or di merdia, bo ta haya un rij largo di cliente para pafo wardando pa e negoshi habri despues di siesta.

La Linda semper tabata un negoshi cu a sobrevivi cualkier golpi duro cu a dal contra dje, incluyendo e candela devastador na September 2004 cu a destrui nan edificio principal cu tin net pariba di Dufry’s.  E lugar ey awor a djis keda bashi y ta wordo usa pa parkinglot.

Tog La Linda a wanta e shock ey, y a centraliza su negoshi den e edificio nobo di 3 piso na comienzo di Caya Betico Croes.  Pero ultimo temponan e fluho di cliente a mengua, posiblemente debi cu nan no ta haya e mercancia desea mas den stock, of kizas debi cu clientenan a cuminza mas bay den direccion di Online Shopping.

Aki por keda henter un dia ta apunta dede y purba di pusha e culpa riba schoulder di un hende, incluyendo e hecho cu clientenan ta confronta problema un biaha mas pa haya parkeo pa haci shopping den caya grandi.

Hecho ta cu un di e nucleo comercial di hopi decada lo bay stop di existi.  Kizas e negoshi mester a cambia e concepto di tienda, of lucha pa trece productonan di bon calidad na prijs atractivo pa pueblo.  Nan a hasta crea un Coffeeshop na un di e pisonan cu tabata ofrece cuminda na publico.  Pero esaki tampoco no a logra atrae e clientena pa bin den e negoshi.

COMO 51 EMPLEADO:

Hecho ta cu pa fin di e luna aki, La Linda Department Store den Caya Betico Croes lo cera su porta pa semper.  Tur 51 empleado a wordo avisa verbalmente door di abogado, pa mustra cu nan ultimo dia di trabao lo ta 31 di December 2018.  DIARIO a compronde cu un tristeza enorme a reina cerca empleadonan, pasobra hopi di nan tabata considera La Linda como “nan cas”.  Cu hopi aña di servicio fiel na e compania, awor nan ta mirando nan futuro scur.

Reforma Fiscal ta planea pa yuda pueblo keda tur fin di luna cu mas placa den Cartera.  Pero si di otro banda, e waf ta sigui pone tur producto keda cu prijs halto, ta kico comerciante y pueblo tin di haci e ora.

La Linda ta e pacus cu semper tabata percura pa decora su fachada tanto pa cualkier celebracion di Dia Nacional y di demas observacionnan festivo.  E ta un di e lugarnan hopi importante den temporada di Carnaval, como cu aki mayoria hende ta bay cumpra tela pa bistir y pa decoracion di articulonan pa Carnaval.

 

- Advertisement -

DUNA COMENTARIO

Please enter your comment!
Please enter your name here