Home Hudicial Fiscal kier pa mas investigacion den caso di 2 ruman sospecha di...

Fiscal kier pa mas investigacion den caso di 2 ruman sospecha di a malversa mey miyon Florin

553
0
SHARE
- Advertisement -

ORANJESTAD (AAN): E rumannan muhernan E.F. y E.M.F. a presenta dilanti Hues recien relaciona cu un caso penal cu ta andando desde 2007. Nan abogado mr. de Hoogd a cuestiona e hecho cu despues di cu e caso a keda posponi na 2011 no a tende nada mas te cu awor.

E ta haya cu demasiado tempo a pasa y e dos rumannan a kere cu tur cos a pasa. Fiscal a pidi Hues pospone e caso pa otro aña Maart 2019 pa asina e check cu belasting encuanto e caso. Hues a bisa cu enberdad hopi tempo a pasa pero e ta duna Fiscal a ultimo chens.

   MALVERSACION:

Fiscal a bisa Hues cu e caso na 2011 a keda posponi pa investigacionnan tuma lugar caminda a scucha testigonan. Ta sospecha e rumannan E.F. y E.M.F. di a falsifica documentonan di belasting di mas o menos 500 mil Florin.

Tambe nan ta worde acusa di malversacion di placa di un compania. Fiscal a bisa Hues cu na 2015 a scucha testigonan. E victima P. a cuminsa caso civil contra E.F. y E.F. caminda el a demanda pa condena nan pa paga. Fiscal a sigui bisa cu despues e caso penal a keda para lamentablemente pero awor e kier sigui cu e caso.

Hues a puntra e homber P., cu tabata presente den sala di Corte, con a bay cu e caso. Segun P. ainda nan no a paga nada. E tabatin sentencia di Hof den su man pa mustra Hues, caminda Hof ta ordena E.F. pa paga 1.5 miyon Florin. Hues a puntra con leu ta para cu e caso di belasting. E.F. a bisa Hues cu nan ta papiando pa determina cuanto e suma ta cu e mester paga back y pa mira si E.F. por paga back. E.M.F. a bisa Hues cu ainda e no a worde yama pa belasting. Fiscal a pidi Hues pa bolbe pospone e caso pa e bay averigua con tur cos ta para cu belasting. El a pidi pa pospone e caso pa Maart 2019.

   TARDA MUCHO CU E CASO:

Abogado mr. de Hoogd a bisa Hues cu e caso ta data 2007 – 2011 mientras cu e casonan ta di 2004. Ta papia aki di casonan hopi bieu. Na 2015 a scucha testigonan. E abogado a sigui bisa cu Fiscal a notifica cu e caso lo ta pro forma o sea cu no tin tratamento.

Na opinion di mr. de Hoogd, Fiscal a viola a periodo stipula pa un caso penal. El a mustra cu na Hulanda segun hurisprudencia di Corte Supremo no tin casonan mas bieu cu 3 pa 4 aña. E abogado a mustra cu na Aruba segun ley di caso penal, Hues por dicidi riba peticion di Fiscal pa pospone e caso y determina ki dia caso lo sigui.

E abogado a remarca cu e interogacion na September 2015 ya tabata mucha laat. E ta haya cu ta inhusto cu awor ta bay sigui cu e caso. E abogado a bisa Hues cu e dos rumannan tabata bou di e impresion cu caso lo no sigui mas. Nan a keda sorprendi cu nan ta worde cita pa presenta awor na 2018 den Corte. Na 2015 no a sigui cu e caso sino tres aña despues. E abogado ta haya cu segun ley, mucho tempo a transcuri. Mr. de Hoogd a pidi Hues pa caba cu e caso y no persigui nan mas. E abogado a remarca tambe cu e casonan civil y beleasting ta separa di e caso penal y no manera Fiscal kier laga mustra.

Fiscal a reacciona cu pa Ministerio Publico e caso civil tabata importante y pesey no a sigui cu e caso. Hues a remarca cu e no ta mira pakico Fiscal kier bay papia cu belasting si belasting mes por haci su caso. Hues a mustra cu despues di 2015 e caso a keda para. Fiscal a mustra cu na 2007 e caso cuminsa y na 2011 a sigui. El a bisa cu por bien ta cu despues di haya informacion di belasting, e lo bisa cu no tin interes pa castigo penal.

   CASO POSPONI:

E sospechosonan a splica Hues cu a yama puntra y no a haya claridad si tin caso of no. Nan ta den inseguridad. Hues a bisa cu e ta rechaza peticion di abogado pa para e caso. E ta haya enberdad cu e caso a tarda masha hopi pero esey no ta hustifica pa para e caso.

E ta haya cu ta na su lugar pa Fiscal busca informacion for di belasting pa por prepara su exigencia. Hues a bisa Fiscal cu 21 Maart 2019 definitivamente pa 8.30 lo trata e caso y cu Fiscal mester dicidi si tin caso of no.

 

- Advertisement -

DUNA COMENTARIO

Please enter your comment!
Please enter your name here