Home Economia Gobierno a revela cambionan cu lo wordo introduci cu e Reforma Fiscal

Gobierno a revela cambionan cu lo wordo introduci cu e Reforma Fiscal

217
0
SHARE
- Advertisement -

ORANJESTAD  (AAN): Dialuna atardi, na Marriot Hotel, gobierno di Aruba a haci anuncio di e cambionan importante pa loke ta e reforma fiscal.

Minister di Finanzas, Xiomara Ruiz-Maduro a duna di conoce cu a cana un proceso y a reuni cu conseheronan, expertonan y stakeholders pa yega na e decisionnan cu a wordo tuma pa drenta na vigor 1 di januari 2019.

E cambionan fiscal tin enfoke riba e desaroyo economico di e isla y ta mira 6 sector prometedor cu tin prioridad.  E cambionan aki lo drenta na vigor entrante Januari 2019.

Durante un presentacion a splica na prome luga con a haya Aruba, y e situacion financiero dificil cu a hereda. Despues a splica con den e siguiente dos aña lo traha den diferente fase pa trece e cambionan fundamental na e sistema di belasting.

SISTEMA DI BELASTING ANTICUA

E sistema di belasting actual ta hopi anticua, y no por reacciona bon riba desaroyo economico. E sistema di belasting actual ta causa hopi tardansa, principalmente pasobra e ta complica. Un otro aspecto di e sistema actual ta cu e no ta husto. Tur esaki Gabinete Wever-Croes kier cambia. Mirando con grandi e trabou ta, a dicidi di parti esaki den 4 fase.

LO TRAHA DEN FASE

– FASE 1 lo trata e belastingnan mas personal, manera loonbelasting, inkomstenbelasting y  grondbelasting; tambe lo trata e belastingnan cu ta causa comportacion negativo, manera alcohol y esunnan cu ta afecta salud, manera sigaria, y nos kier frena nan. Esakinan ta wordo yama “sin” taxes. E prome fase lo wordo introduci dia 1 di januari 2019.

– FASE 2 lo trata e belastingnan indirecto, manera BBO, invoerrechten y mas di e “sin” taxes.

– FASE 3 lo trata e belastingnan cu comerciantenan ta paga, manera winstbelasting, y dividendbelasting, y e reforma di inkomstenbelasting, pa haci’e mucho mas sensiyo.

– FASE 4 finalmente lo trata e belastingnan cu turista ta paga, manera roomtax, car rental tax, etc.

Den un articulo apart lo elabora riba cada tipo di belasting cu lo conoce cambio entrante 2019.

 

- Advertisement -

DUNA COMENTARIO

Please enter your comment!
Please enter your name here