Home Politica Gobierno ta creando mas espacio pa importacion di pobreza na Aruba

Gobierno ta creando mas espacio pa importacion di pobreza na Aruba

103
0
SHARE
- Advertisement -

Segun Booshi Wever:

ORANJESTAD (AAN): Aruba ta sobrepobla y Aruba tin problemanan socio-economico inmenso y toch e gobierno aki, particularmente e minister encarga cu husticia, ta continua e maneho di e gobierno anterior y hasta ta bay un stap mas leu, segun Booshi Wever di Partido UPP.

Riba e website di Dimas nos a encontra instrucionnan cu por simpelmente wordo considera un crimen contra nos pais y nos pueblo. E instrucionnan ta encera e.o. un “bijzondere band”, loke nifica cu ken cu ta por drenta sin ningun tipo di screening whatsoever y bin goza di loke nos pueblo pa añanan largo a lucha p’e. UPP ta haci un suplica pa subi riba e website di Dimas y huzga pa boso mes kico e maneho aki lo nifica. Pa colmo awe ta trata e cambio di ley cu Raad van Advies a hasta considera como un quick fix, pa asina regla e flexibilisacion, unda cu e Modelo Suizo lo desaperece y lo no bay tin toetsing mas di matrimonio ficticio.

Si den pasado a opta pa un “open-door-policy”, awor a scohe pa un maneho di “no-frame, no-window, no-door- policy”!! Cu tipo di maneho asina loke sigur lo ser crea y importa ta mas pobresa y consecuentemente mas criminalidad y finalmente e maneho aki lo percura cu pronto e ARUBIANO lo desaparece y e ARUBIANO lo ta riba un “HIGHWAY  TO HEAVEN”!

Den e articulo aki nos kier a para keto riba solamente 3 puntonan (tin hopi mas) cu nos a encontra den e maneho anti-ARUBIANO cu e minister actual mr. Andin Bikker a bin cune cu consentimento di e gobierno POREDmep y aprobacion di e parlamento den su totalidad.

* E prome punto cu nos kier toca ta esun di e “inwonende dienstbode”. Den e maneho nobo, e “inwonende dienstbode” por trece su yiunan Aruba.  Dus si ta 5 yiu e tin e por trece tur 5! Mester corda cu un “inwonende dienstbode” no ta gana ni 700 florin pa luna y di cual e doño di trabou no ta paga ni 1000 florin na prima di AZV pa aña.

Den cuadro di esaki ta bon y ta interesante pa pueblo sa cu entre 2009 y 2017 mas di 2000 permiso di “inwonende dienstbode” a wordo firma ( pa colmo hopi ta hende homber) dus hopi “butlers” aki na Aruba. Imagina boso mes si tur e “inwonende dienstbodes” trece nan yuinan Aruba,  con hopi esaki lo pisa riba nos comunidad. No ta pornada e gobierno di AVPOR a introduci e asina yama BAZV pa cubri e extra gastonan cu e maneho ey a trece cune. Pues no ta e stranhero ta paga pa esaki pero nos pueblo ta paga pa esaki. Awor e gobierno POREDmep ta completa e desaster aki dor di crea e posibilidad pa nan por trece nan yiunan tambe.

Si e 2000 “butlernan” dicidi di trece nan yuinan, lo nos wordo confronta di inmediato cu un aumento di alrededor di 6000 mucha cu lo mester biba cerca e mama of tata cu ta gana 700 florin. Kico esaki lo nifica pa AZV? Kico e cantidad di muchanan lo nifica pa nos scolnan? Corda den cada famia di por lo menos 3 hende lo mester biba di 700 florin pa luna, esaki no ta fomenta pobresa? No ta crea posibilidad cu e yuinan por drenta e circuito criminal? Gobierno, lesa pueblo ta esun cu tin di bay garantisa un biba digno di e hendenan aki? Aki a kita e porta (door)!!!

* Un otro punto masha remarcabel y hopi peculiar ta esun di un hende cu tin un “BIJZONDERE BAND” cu Aruba. Ken por bin na remarke pa esaki?

Un ehempel: un Canades a nace na Aruba na aña 1930, a emigra pa Canada y a naturalisa Canades. Su bisa-nieto lo por bin na remarke pa un permiso pasobra su bisa-buelo  a nace na Aruba  88 aña pasá. Esaki ta wordo considera como un “bijzondere band”!!

Aki a kita e bentana (window)

* Awor si un stranhero cu permiso, tin un “PARTNER” cu ta biba afó, pues no un esposo of esposa, e stranhero ey tambe por trece su “partner”!! Con bo por sa cu si nan ta “partner”? Si ta existi awor caba masha hopi matrimonio ficticio, esaki lo ta bira un “partnership” ficticio?

Y pa colmo tin un exigencia cu de facto ta un manipulacion di marca mayor y ta un “dode letter”. Un di e exigencianan ta cu mester sera un seguro priva!!! Pero e “partner” aki cu e permiso den su man, TA wordo inscirbi na Censo. Esaki tin como consecuencia directo cu e ta haya derecho pa busca su carchi di AZV, sin cu a aporta nada nunca y sin sa ki tipo di enfermedad elo por tin. Pues atrobe ningun hende sa ki tipo di hende lo permiti drenta. Y no lubida e pareha aki por tin yui tambe y alo largo tambe lo por bin na remarke pa un permiso.

Cu esaki a kita e kozijn (frame) tambe.

Esakinan ta djies 3 punto, banda di tur otro aspectonan di e maneho anti-ARUBIANO, cu lo conduci na e desaparicion di e ARUBIANO. E maneho di e gobierno aki di POREDmep ta nada otro cu un continuacion di e maneho di AVPOR, cu un dimension extra. Tur dos gobierno ta simpelmente pensa riba e “next election” enbes di pensa riba e “next generation”!!

Ta p’esey un biaha mas UPP kier suplica e pueblo pa lanta ariba, e tempo di para wak a pasa. Si no haci esaki, e ARUBIANO lo desaparece. Si un par di siman pasa nos a trece cu e ARUBIANO tabata riba “highway to heaven ” cu e dimension nobo aki, UPP ta kere cu e ARUBIANO lo ta riba un “SHORTCUT TO HELL”!!!!

 

 

- Advertisement -

DUNA COMENTARIO

Please enter your comment!
Please enter your name here