Home Parlamento Henk Kamp a wordo nombra contra Ley di LAFT

Henk Kamp a wordo nombra contra Ley di LAFT

95
0
SHARE
- Advertisement -

Segun Parlamentario Endy Croes

ORANJESTAD (AAN):  Parlamentario Endy Croes ta acusa Hulanda di a actua contra Ley di LAFT pa cu e nombramento di Henk Kamp como miembro di CAFT. Parlamentario Croes ta lamenta masha hopi con Hulanda ta trapa riba ley cu tur su forsa sin importa y sin respeta. Aki rato lo splica ampliamente con esaki ta hinca den otro.

No por ta asina cu Aruba ta mantene su mes nechi respetando palabracionnan y sigur respetando nos leynan. Si no tin respet pa nos leynan anto nos lo mester papia di un “BANANEN REPUBLIEK”. Segun Parlamentario Croes asina Aruba ta wordo trata door di Hulanda.

Nombramento político den CAFT

Laga nos splica al grano e nombramento di e politico Henk Kamp den CAFT. Den e Ley di LAFT, esta e Landsverordening Aruba Financieel Toezicht tin ancra den Artikel 3 con e constelacion di e College (CAFT) ta hinca den otro. Esta e 3 miembronan di cual Presidente ta wordo nombra door di “regering van het Koninkrijk”, Aruba ta nombra un miembro y Hulanda ta nombra e di tres miembro.

Artikel 4 di e Ley di  LAFT sinembargo ta regla hopi cla entre otro condicionnan pa bo por ta miembro y alaves ki ora bo NO lo por wordo nombra como miembro. Aki mi kier ilustra con Hulanda ta trapa riba ley sin importa un  bledo y mi ta sinti  personalmente cu Aruba no mester acepta esaki sin mas y mester cuminsa exigi pa Henk Kamp como un POLITICO bieu y bakia comprende cu esaki No por y entrega asina su retiro inmediatamente.

Artikel 4 Lid d ta papia cla ki ora bo no lo por bira miembro di CAFT y mi lo pone esaki textualmente: een lid van de Staten of van een daarmee vergelijkbaar orgaan van Nederland, of op de lijst staan OF HEBBEN GESTAAN van enige politieke partij binen het Koninkrijk der Nederlanden”, no por wordo nombra como miembro di CAFT.

Henk Kamp ta un politico cu tabata riba lista di VVD, esta e lista hustamente di e partido di Rutte, e Minister President actual di Hulanda. Pues Regering van het Koninkrijk a comete un BLUNDER cu e nombramento aki sin mas. Inaceptable si Hulanda ta papia di integridad  anto Hulanda ta trapa Ley di LAFT na e manera aki?

Trapamento riba ley

Parlamentario Endy Croes ta manda señal pa Hulanda, si bo kier supervisa Aruba via CAFT nos no tin nada contra pero bo mester ta un Mama cu por duna bon ehempel y den e caso aki bo ta mustra abiertamente bo caracter di un mal Mama atrapando asina nos leynan vigente. Mas tristo ta cu bo ta actua contra un ley cu mama Hulanda mes a traha  destilando esaki for di e protocol di 2 Mei 2015. Inaceptable bo bisa nos cu bo no sa.

Ya cu nos ta den e antesala pa trata Ley di LAFT anto encarecidamente nos ta pidi Henk Kamp pa entrega su retiro como muestra di a peca contra ley y alaves dunando ehempel di integridad.

Henk Kamp ta un politico bakia y ta imposibel e mes por a acepta e puesto aki. Pues hancho pa bo y smal pa nos. No way!! Nos tin tur prueba y lo vocifera esaki fuertemente den Parlamento momento cu trata e Ley di LAFT pa e keda graba den historia con Hulanda ta trapa riba ley segun e kier. Parlamentario Endy Croes ta termina haciendo un peticion na bon manera na Henk Kamp kende tabata ex minister di Volkshuisvesting en Ruimtelijke Ordening en Milieubeheer 2002-2003, alaves minister di defensa te cu 2007 y minister di economische zaken 2012 pa 2017 pa e entrega su retiro na un manera nechi cumpliendo asina cu Ley di LAFT.

 

- Advertisement -

DUNA COMENTARIO

Please enter your comment!
Please enter your name here