Home Hudicial Hues no ta haya cu por prueba cu grupo a importa 140...

Hues no ta haya cu por prueba cu grupo a importa 140 kilo di marihuana

410
0
SHARE
- Advertisement -

Casi tur e sospechosonan a haya castigo combina envez di 5 aña exigi pa Fiscal

ORANJESTAD (AAN): Un caso caminda un famia ta envolvi den importacion di un lote di marihuana, a cambia di seriedad ora cu Hues den su sentencia ta bisa cu e no ta sigui punto di bista di Fiscal cu ta 140 kilo di marihuana a keda importa.

Hues ta haya cu aki ta specula algo pero no por prueba esaki. Hues a sali for di e punto di bista cu ta castiga e grupo pa e 10 kilo di marihuana cu a confisca. Esey a haci cu e castigo di 5 aña di prison cu Fiscal a exigi pa e mayoria di e sospechoso, a bira un castigo combina.

IMPORTA DROGA:

E sospechosonan ta e muher E.G., e muher hoben J.(16), e hombernan G.K., I. (16) y J.J.K. Luna pasa tratamento di e caso a tuma lugar y recien Hues a dicta sentencia. E acusacion cu Fiscal a presenta contra e grupo di cinco ta cu entre 5 y 6 Mei 2018 nan a importa bultonan di droga na costa Norte, na altura di Daimari. Polis a confisca 10 kilo di marihuana cu tabata consisti di 18 paki.

E pakinan aki tabata forma parti di lotenan di droga cu tabata hinca den 7 jerry can. Ademas di e acusacion aki, E.G. ta worde acusa cu riba 6 Mei 2018, e tabata den posecion di balanan cayente. E droga a worde haya na cas di E.G., kende na September 2018 a worde laga liber pendiente di e caso aki. Awor ta resulta cu E.G. a bay Hulanda.

Ta asina cu I. (16) ta bibando na Hulanda y a haya citacion pero laat. E citacion ta worde declara no admisibel pasobra no a cumpli cu e periodo den cual e citacion mester a worde entrega. I. ta yiu di E.G. y e partner di E.G., I.K., cu ta sera den KIA y e tabata comunica cu su yiu homber I. y otro famianan pa busca e droga. Ta asina cu tur e yiunan di E.G. a bay Hulanda. Pesey E.G. a dicidi di bay cerca su yiunan.

   140 KILO DI MARIHUANA?

Fiscal a mustra cu 7 jerry can carga cu marihuana a worde importa. Segun calculacion di agentenan di narcotica cu tin experencia, den un jerry can tabatin 20 kilo di marihuana. En total ta 140 kilo di marihuana a keda importa.

   CASTIGO EXIGI:

Pa cu e castigo, Fiscal a bisa cu e ta tene cuenta cu maneho di Ministerio Publico y castigonan cu Hof ta duna pa casonan asina. El a tene cuenta cu J. tabatin 15 aña y ta bayendo school. Fiscal a aplica e ley hubenil pero no kier pa J. bay sera. Awor J. tin 16 aña. El a exigi 180 dia di prison di cual 170 dia ta condicional, 2 aña di prueba y bou guia di Reclasering. Tambe Fiscal a exigi 120 ora trabao pa comunidad.

Pa loke ta e homber G.K., J.K. y e muher E.G., Fiscal ta haya nan culpable di importacion di mas cu 100 kilo. Normal ta exigi 6 aña di prison. Fiscal a tene cuenta cu nan circumstancia personal y a exigi 5 aña di prison y a pidi pa detencion atrobe di G.K. cu actualmente ta liber. E cosnan confisca entre otro computer, placa, cellular por worde debolbe.

SENTENCIA:

Hues recien a dicta sentencia caminda el a bisa cu E.G., J.K., G.K., J.J.K., a trece droga den jerry can. 5 Mei 2018 e droga a yega na costa norte. Na cas di E.G. a haya e lote droga. En total 10 kilo di marihuana a confisca.

Hues ta haya legalmente proba cu e grupo aki ta complice di importa droga. Hues a mustra cu na cas di E.G. a haya tambe matanan di marihuana y bala cayente. Tambe a haya matanan di marihuana na cas di J.J.K. Hues a bisa cu e caso ta serio. Droga ta trece cosnan malo pa Aruba. Pa cu e castigo, Hues a bisa cu e ta tene cuenta cu ta trata di “shoft drugs” y no “hard drugs”. Tambe Hues a tene cuenta cu nunca antes e grupo aki a worde condena. Hues a sigui bisa cu e ta tene cuenta cu J.K. tabatin 19 aña ora e importacion a sosode y ta na Hulanda y ta studiando. G.K. ta trahando y bibando cu su pareha. E.G. a bay cerca su yiunan na Hulanda. Hues a bisa cu e ta tene cuenta cu raport di Reclasering y castigo cu Hof ta duna den casonan asina.

   NO PROBA 140 KILO DI MARIHUANA:

Na opinion di Hues, no a keda cla cuanto droga precies a importa. El a mustra cu Fiscal ta sali for di punto di bista cu ta 140 kilo, door di asumi cu 20 kilo lo bay den un jerry can. Hues a bisa cu den caso penal no por bay asumi.

E no ta comparti e punto di bista di Fiscal pa cu e cantidad di droga. Hues a bisa cu e ta usa e 10 kilo di marihuana cu a haya na e cas. El a bisa cu no lo aplica castigo hubenil pa J.J.K. y tampoco pa G.K.

CASTIGO:

Hues a condena J.J.K. na 720 dia di prison di cual 705 dia ta condicional cu un tempo prueba 3 aña. A kita e 15 dianan cu e tabata sera.

Hues a condena G.K. na 720 dia di prison di cual 697 dia ta condicional cu un tempo di prueba 3 aña. Hues a bisa tambe cu e Jeep di G.K. lo keda confisca y tambe su cellular, pasobra nan a worde usa pa e importacion di droga.

Hues a condena E.G. na 720 dia di prison di cual 604 dia ta condicional cu un tempo di prueba di 3 aña.

Hues a aplica castigo hubenil pa J.K. y a conden’e na 100 ora di trabao pa comunidad di cual 50 ora ta condicional.

 

- Advertisement -

DUNA COMENTARIO

Please enter your comment!
Please enter your name here