Home General Inicio refineria China y Venezuela na Guandong

Inicio refineria China y Venezuela na Guandong

241
0
SHARE
- Advertisement -

Den antesala reunion OPEC acuerdo Venezuela y Rusia

Mester defini posicion CITGO na Aruba cu urgencia

Acuerdo Aruba no a tene cuenta cu politica internacional

ORANJESTAD  (AAN) — Cu e acuerdo cu a ser firma dor di Gobierno anterior cu CITGO y cu Parlamento di Aruba no a haya oportunidad pa studia debidamente, Aruba a hinca su mes den un situacion di riesgo grandi. Un aspecto cu sigur no a haya atencion tabata e situacion politico mundial cu tabata mara na CITGO. E urgencia pa defini e futuro di CITGO a bira completamente bisto e siman aki cu desaroyonan internacional. Presidente Maduro a mara su pais na su aliadonan financiero y ideologico Rusia y China mientras e fecha di prolongacion di su presidencia ta acerca y OPEC ta dicidi riba futuro petrolero. 

Con grandi e speransa di rehabilitacion di e refineria di Aruba por ta den e situacion internacional cu a surgi y pa cual DIARIO a adverti?

Cu e actual situacion politico internacional, cu ta afecta futuro di e refineria directamente, por a desaroya tabata evidente for di momento cu gobierno anterior a firma e acuerdo di CITGO, cu ya tabata parcialmente borg di Rusia debi na debe cu Venezuela tin cu Rusia.

Gobierno anterior mester tabata sa cu situacion financiero y economico di Venezuela, di cual CITGO Aruba ta depende, tabata sumamente dificil pa por a realisa e proyecto.  Si gobierno anterior a studia e situacion mundial manera e acuerdo tabata rekeri, lo el a realisa e ruleta internacional cu el a pone Aruba aden.

Venezuela y CITGO tabata mara na Rusia cu ta uza su poder financiero y economico pa sigura su mes poder riba Venezuela como pais di OPEC. Gobierno anterior mester a studia e resultadonan cu e acuerdo cu Venezuela lo tabata tin.

Awe tur desaroyo ta uni pa Aruba haya un bista kico ta bay pasa cu e refineria na Aruba, pa cual actualmente ta realisa e parti di inspeccion cu ta dicidi riba e gastonan envolvi.

REFINERIA DI CASI 10 BIYON NA CHINA 

Venezuela cu ta doño di CITGO y PDVSA te awe no a duna Aruba garantia por escrito cu e proyecto na Aruba, cu a tranca economia y situacion financiero di e pais, lo continua.

E garantia cu mundo a haya ayera di parti di PDVSA y Venezuela ta cu Venezuela lo tin 40 porciento di interes den e refineria nobo cu lo construi na China y cu mester realisa su prome produccion di prueba na 2021.

Pa construccion di e refineria, cu a conoce su inicio ayera, Venezuela lo tin 40 porciento di participacion y China 60 porciento.

Ta trata di e inversion mas significante di China den un refineria y di hopi importancia pa Venezuela, cu na e momento aki ta uza CITGO na Merca como e baca di lechi pa e haya placa.

Aruba tabata sa cu Venezuela debe China hopi placa y cu e forma di paga China tabata entrega di producto petrolero mescos cu ta pasa entre Venezuela y Rusia.

China lo a hinca 60 Biyon den Venezuela y por lo menos 20 Biyon ainda ta debe cu Venezuela mester paga China ainda.

E construccion di e refineria na China mester subi produccion petrolero cu a cay te suela na Venezuela.

VENEZUELA CU RUSIA DILANTI OPEC AWE 

Un inyeccion di Seis Biyon cu Rusia lo duna Venezuela, ta mara Venezuela na Rusia cu awe mester enfrenta paisnan di OPEC.

Manera ta conoci produccion di petroleo na mundo ta depende di paisnan di OPEC y paisnan cu no ta OPEC manera Rusia y Merca cu tin un participacion grandi den e produccion mundial di petroleo, cu a conoce un caida grandi den prijs.

Nicolas Maduro di Venezuela mester di sosten pa e por prolonga su presidencia na Venezuela y ta trata di logra esaki dor di sosten di Rusia cu mester di Maduro pa por enfrenta OPEC.

Rusia a dicidi pa bolbe duna Venezuela un inyeccion di 6 Biyon Dollar. No ta conoce kico e exigencia di Rusia exactamente lo ta.

Na 2014 Venezuela a duna Rusia 49.1 porciento den CITGO pa debenan cu Venezuela tabata tin cu Rusia. Kico ta bay pasa cu CITGO, manera DIARIO a mantene cu insistencia basa riba informacion concreto no ta conoci.

Hecho ta cu Aruba mester tuma un decision cu urgencia riba e futuro di e refineria na Aruba cu mester ser rehabilita mientras PDVSA ta bira un doño parcial di e refineria nobo na un di e partinan comercial di mas interes na China.

DIARIO ta keda pendiente pa sigui informa Aruba.

- Advertisement -

DUNA COMENTARIO

Please enter your comment!
Please enter your name here