Home Cultura Lilly Peterson a gradua den Master of Arts den Museologia

Lilly Peterson a gradua den Master of Arts den Museologia

109
0
SHARE
- Advertisement -

Aruba ta conta awor cu dos Museologo

ORANJESTAD (AAN): Prome di september 2018 señora Lilly Peterson a gradua na e Reinwardt Academia na Amsterdam di e programa internacional di museologo cu e titulo Master of Arts den Museologia.

Señora Peterson ta comparti un parti di su trajectorio museologico cu nos.

‘Den e añanan diesnuebe setenta no tabata tin museo na Aruba y tampoco tabata tin hopi exhibicion na San Nicolas  durante di mi hubentud. E prome exhibicion cu mi a bishita tabata na e scol basico cu mi a atende. E exhibicion tabata consisti di trabou di borda di e muchanan di e scol incluyendo esun di mi persona. Esaki a crea un amor den mi curason pa exhibicionan. Mi a atende otro exhibicionan cu tabatatin na Aruba den e añanan prome cu mi a bai Hulanda pa studia pa bira docente den arte.’

‘Na e edad di diescuater aña mi a atende un exhibicion na YMCA na San Nicolas. Nan tabata tin un concurso den bolo dorna cu suku. Otro exhibicion a wordo teni na Club Don Bosco cu nan Science Fair y Cas di Cultura cu pinturanan. E momento mas importante pa mi tabata e Carnaval cu su costumnan luhoso.’

‘Ora mi a caba Collegio Arubano mi a bai studia na Hulanda pa bira docente den e obra di arte. Un parti di e educacion aki a consisti den bishita museo cu tabata un di e partinan cu mi a gusta hopi. Despeus di mi educacion mi a keda bishita otro pais djis pa wak museo. Esaki ta conta pa Aruba tambe pasobra ora mi tabata bin bishita mi famia semper mi a bai wak e museo Archeologico cu a habri na Zoutmanstraat na aña diesneube ochenta y cuater. Den e tempo ey mi a traha un les con pa traha potchi di klei usando e tecnica di indjan cu informacion haya na museo Archeologico di Aruba y museo Etnologico na Leiden; e museo etnologico mas biew na Europa.’

‘Mi a regresa Aruba den e aña dosmil seis y mi a keda bishita e museonan nacional na Aruba. Esakinan tabata e museo Archeologico y e museo Historico. Na un di e bishitanan aki mi a cera conoci cu un archeologo cu a bin di Hulanda. Mi a copia pinturana di indjan for di e cuebana pa su buki cu lo wordo publica. Tambe mi a asisti e museo Historico cu investigacionan pa na exhibicion di vlechtmento di sombre. Mi ta afortunado pa ta parti di e momentonan historico aki riba nos isla.’

‘E experencianan aki hunto cu e conocemento cu San Nicolas lo bira e capital cultural di Aruba; mirando cu mi edificio faborito wordo renoba a inspirami pa mi sigui mi soño pa traha den e sector cultural.’

‘Na aña dosmil y diesseis mi a aplica na y mi a wordo acepta den e curso International di Master of Arts den Museologia na e academia renombra cu ta yama Reinwardt Academy na cuidad Amsterdam di Hulanda. Mi tabata afortunado pa hasi mi stage na e Nationaal Museum van Wereld Culturen cu ta consisti di cuater museo. Esakinan ta e Ethnologisch Museum na Leiden, Tropen Museum na Amsterdam, Wereld Museum na Rotterdam y Afrika

Museum na Nijmegen. Nan collection conhuntamente ta existi di un million di objecto cu ta inclui e coleccion mas grandi di e islanan Caribense di Hulanda pafo di e Caribe. Mi tabata tin e placer di investiga e coleccion di Aruba cu a wordo colecta door di pastoor van Koolwijk cu ta e prome hende cu a colecta objectonan di Aruba cu a wordo warda na museo na Hulanda.’

‘Na september di e aña aki mi a ricibi mi certificado Master of Arts den Museologia. Mi ta interesa den duna aviso riba y yuda crea un manejo cultural. Tambe mi ta interesa den hasi invesigacionan tocante nos cultura pa crea concocimiento riba e areanan desconoci.  Mi ta enteresa di ta parti di e preservacion, conservacion y presentacion di nos herencia pa nos hendenan di awor y pa nan den futuro. Mi ta hopi interesa den e parti di nos cultura cu nos tin comun cu otro pais y e mundo.’

‘Aruba ta un isla unico compara cu otro isla den Caribe pa su cultura y mi lo kier wak nos herencia cultural Arubano riba e lista di Unesco como herencia mundial.’

E coleccion van Koolwijk

Van Koolwijk tabata un pastor y un collectionista amateur di objetonan na e islanan ABC.

E sacerdote aki a biba na Aruba den e tempo cu tabata tin Indjan na Aruba ainda.

E tabata e prome hende cu nos sa di dje cu a coleccta objetonan y a laga nan wordo warda na e Rijks Museum van Oudheden na Leiden na Hulanda. E objetonan aki a wordo poni riba e exhibicion mundial na Paris den e aña 1888.

Van Koolwijk a ricibi un medaya pa e trabao bon hasi. E a crea un coleccion exceptional di e bida na Aruba prome cu e siglo diesnuebe.

E coleccion di Aruba ta consisti di por ehempel di un Baganja tambe conoci como Tapara, Lele of Kadri, Palte, Suadera, Hikoe, Keke, Tjaraska, Trimonial,……

E informacion tocante di e obhetonan a wordo saca for di e buki di Johan Hartog, Aruba zoals het was zoals het werd, Gebroeders de Wit, Aruba Nederlandse Antillen, 1953, paginanan number 459 te cu 460.

- Advertisement -

DUNA COMENTARIO

Please enter your comment!
Please enter your name here