Home Hudicial Mañan sentencia ta cay pa homber cu a abusa di su dos...

Mañan sentencia ta cay pa homber cu a abusa di su dos yiu muher menor di edad y saca un na estado

396
0
SHARE
- Advertisement -

ORANJESTAD (AAN) – Mañan mainta Hues di Corte den Promer Instancia ta dicta sentencia den e caso penal cu Ministerio Publico a cuminsa contra e homber R., acusa di a abusa di su dos yiunan muher menor di edad y a saca un na estado. Ta asina cu Fiscal a exigi 8 aña di prison pa R.

ABUSO SEXUAL

Luna pasa tratamento di e caso aki a sosode caminda Fiscal a bisa Hues cu e acusacionnan contra e homber R. ta cu entre 2013 y 2018 el a tene relacion sexual cu su mesun yiunan cu tabata bou di 16 y 12 aña. Ta asina cu mama di e muchanan tabata presente den sala di Corte y e sospechoso R. a admiti tur cos. Tabata hopi dolor pa e mama pa scucha con R. tabata abusa di su yiunan muher. E sospechoso R. a cuminsa cu un di e muchanan tempo e tabatin 10 aña mientras cu e otro el a cuminsa abusa di dje tempo e tabatin entre 11 y 12 aña.

NO TA COMPLETO RESPONSABEL PA SU ACTONAN

Hues a mustra cu tin un raport di psychiater cu ta mustra cu R. tin un educacion hopi abou y e no ta realisa cu loke el a haci ta hopi malo pa cu e muchanan. Psychiater ta conclui cu R. no ta completo responsabel pa su actonan.

MACHISTA Y ABUSA DI SU YIUNAN

Hues a cuestiona R. pa cu su comportacion machista y a mustra cu R. no ta realisa con el a afecta su mesun yiunan pa resto di nan bida.

Investigacion a mustra cu R. no tabata permiti su yiunan sali y ningun hende bin serca su yiunan. Durante e periodo largo di 2015 y 2018, e tabata haci actonan inmoral cu su yiunan y tabata tene relacion sexual cu nan sin usa proteccion.

A sali na cla cu R., varios biaha pa siman tabata abusa di su dos yiunan den tur forma. Masha horibel mes. Den Corte el a hasta confesa na Hues cosnan baho cu e tabata haci cu su propio yiunan cu ni na Polis el a bisa.

SACA YIU NA ESTADO

Tur e abusonan aki a causa cu un di e muchanan a sali na estado. E mama, un persona cu ta traha duro pa su yiunan, a haya un sla duro ora el a haya sa cu un di su yiunan a sali na estado door di R.

E mama no por a kere cu R., cu un actitud machista, cu no tabata laga e yiunan sali, tabata abusa di nan yiunan.

Hues ta haya cu R. a abusa di e confianza cu su yiunan muher tabatin den dje, como tata.

MUCHANAN BOU TRATAMENTO

Hues a mustra cu awor e muchanan, victima di abuso di nan propio tata, lo keda afecta pa resto di nan bida. Ta asina cu e muchanan ta bao tratamento actualmente.

Hues a bisa cu Reclasering den su raport ta mustra cu R. mester di tratamento tambe pasobra e chens cu e lo bolbe haci algo horibel asina, ta hopi grandi.

EXIGENCIA DI FISCAL

Fiscal a condena totalmente e forma horibel con R. tabata abusa di su mesun yiunan muher durante 4 pa 5 aña. Fiscal a bisa Hues cu e tabatin pensa pa exigi 10 aña di prison. Sinembargo, teniendo cuenta cu e raport di psychiater cu ta mustra cu R. no ta completo responsabel pa su actonan y tambe e raport di Reclasering cu ta mustra riba e peliger cu R. lo por bolbe haci algo horibel asina, el a exigi 8 aña di prison, kitando e tempo cu R. ta sera den KIA.

Hues a palabra cu e ta studia e caso y awe mainta tin sentencia. DIARIO lo informa lectornan di e decision di Hues.

 

- Advertisement -

DUNA COMENTARIO

Please enter your comment!
Please enter your name here