Home Parlamento Mester renova completamente e curriculum escolar, segun Parlamentario Sue-Ann Ras

Mester renova completamente e curriculum escolar, segun Parlamentario Sue-Ann Ras

27
0
SHARE
- Advertisement -

Pa capta mas interes pa studia pa maestro:

ORANJESTAD (AAN) – Den conferencia di prensa di fraccion di MEP, Parlamentario sra. Sue -Ann Ras a hiba palabra, y mustra su preocupacion pasobra na e momentonan aki solamente 14 alumno tin na Instituto Pedagogico Arubano, cu a inscribi pa bira maestro di enseñanza basico.

Aworaki tin un scarcedad enorme di maestro pa enseñanza en general, y den esey pa enseñanza basico.

Si na e momentonan aki 14 alumno so tin na IPA pa enseñanza basico e parlamentario ta puntra su mes cuanto di nan lo no wanta cuater aña y lo cay afo?

Si aki cuater aña IPA a produci solamente diez docente pa enseñanza basico lo mester busca entre e maestronan pensionado pa nan bin traha. Parlamentario Ras ta haya cu mester keda wak e maneho den esaki y wak kico por bin como iniciativa y motiva nos hendenan pa scoge mas den e ramo di enseñanza. No obstante, ora di lesa noticianan for di Hulanda, por mira cu aya tambe tin e problema aki di scarcedad di maestro y nan tambe ta buscando, kiermen mester wak e situacion na un manera mas profundo.

El a lesa un bon articulo unda ta wordo bisa cu ta e mesun sistema di enseñanza cu ta pone como un reto cu hopi hende no kier bay den e ramo aki. Sra. Ras a señala cu ora e ta puntra hobennan alumno di con nan ta studia pa docente, e comentarionan cu nan ta duna ta preocupante.

Nan ta bisa cu tin demasiado problema. Muchanan no ta tende y mayornan no ta coopera, kiermen nan ta haye como un trabao mal gradici. Ta docente no ta un trabao di 7’or pa 1’or pero den comunidad tin comentarionan cu maestronan ta privilegia y cu nan tin dianan di vacacion, etc. Esey ta demotiva e studiantenan cu no kier bay den enseñanza mas.

Sra. Ras a subraya cu si tuma como ehemplo e millenniums y e generacionnan cu ta biniendo, nan no kier bay traha cu cada 45 minuut nan ta duna les splica un materia, sin cu tin interaccion.

Aki el a indica cu e curriculum mester haya un renovacion completo, pa e por bira atractivo. No cu mester duna les di buki of stencil, cu mester saca copia, pero mester ta mas den locual nos ta bayendo den e parti di digitalizacion y globalizacion.

Den e area aki, e dama Parlamentario a indica, mester concentra e curriculum escolar pa por hacie atractivo pa e alumnonan.

Parlamentario sra. Ras a subraya cu un maestro di scol basico ta un docente en general. E tin cu duna tur materia. E ta haya cu mester laga e maestro specializa den e materia cu e gusta, pa e dune di Eerste te 6de klas, por ehemplo Historia, Rekenen, etc. Pues haci mas maestronan pa materia. E ta sigur cu asina lo bay tin un mihor calidad di enseñanza, y esaki Hulanda tambe ta papiando di dje.

Kiermen, cu mester cambia nos sistema, nos structura di enseñanza. E ta compara su mes awor cu tempo el a gradua, y e reto cada dia ta mas desafiante. Maestronan no ta duna mas 45 minuut di les pero hopi biaha ta nan ta bezig cu cualkier tema actual of algo cu pasa cu un alumno cu no ta sinti bon,  nan ta atende esaki y despues ta duna les. El a conclui bisando cu e ta sinti cu e mester bay mas den forma di dialogo di locual ta pasa den veld.

 

 

- Advertisement -

DUNA COMENTARIO

Please enter your comment!
Please enter your name here