Home Gobierno Minister Presidente a presenta loke lo bira e mapa di Reforma Fiscal

Minister Presidente a presenta loke lo bira e mapa di Reforma Fiscal

64
0
SHARE
- Advertisement -

ORANJESTAD (AAN) – Gobierno di Aruba a yama su conferencia semanal di prensa, Dialuna mainta, den cual a hiba palabra Prome Minister Evelyn Wever-Croes y Minister di Infrastructura, Medio Ambiente y Desaroyo Teritorial Otmar Oduber.

Minister Presidente a presenta loke ta bay bira “e mapa di e reforma fiscal”  cu gobierno ta preparando y finalizando aworaki, cual lo wordo publica na comienzo di aña, pa wordo distribui den comunidad.

Den e mapa aki tin splica kico ta e cambionan riba loonbelasting y inkomstenbelasting, y segun e entrada di e persona cu cuanto e impuestonan aki ta baha.

Despues ta bin e parti di grondbelasting, unda tambe dependiendo di e balor di e propiedad, e persona por wak cuanto nan belasting aki ta baha. E mandatario a indica cu tin algun ta subi, pero tambe por compara cu e loonbelasting y Inkomstenbelasting cuanto nan ta baha, y di biaha “per saldo” por haci e calculacion.

E dignatario a indica cu e reforma fiscal ta na caminda pa e wordo trata den Parlamento ohala e aña aki ainda.

Y si esaki no ta e caso, mr. Wever-Croes a señala y bisa cu “gobierno por introduci un parti di dje sin cu mester cambia e ley, pasobra no tur cos den e decisionnan di gobierno ta ley mester cambia”.

E mandatario a reitera un bez mas cu 30 mil ciudadano no ta bay paga inkomstenbelasting ni loonbelasting mas, mayoria di nan ta pensionado. Gobierno ta sinti cu poco, poco nan ta aliviando e peso financiero di e pensionadonan tambe.

El a agrega cu 25 mil ciudadano cu tin un salario alrededor di 2.300 florin pa luna, lo haya un reduccion di su tarifa di loonbelasting y inkomstenbelasting. Esaki pues, ta conta pa e trahador y e clase media. Banda di esaki tambe tin e cambio den grondbelasting, pues riba propiedad.

Di esaki, 28 mil persona lo mira un cambio. Di e cantidad aki 12 mil lo no bay paga mas y 16 mil lo mira un reduccion. Berdad tin un grupo di como 5.700 persona, cu ta esnan cu tin propiedad cu balor riba 750 mil florin, cu tin condominium y no ta biba na Aruba, of cu tin propiedad comercial.

Banda di e cambionan aki tin loke ta derecho di importacion y accijns riba bebida alcoholico y cigaria. E mandatario a subraya cu ta importante pa nos tur bira mas conciente.

E mandatario a señala cu pa nos tur realiza cu abuso di consumo di alcohol y humamento ta causa daño na salud y na e sernan cu nos ta stima; e por causa violencia y haci cosnan cu hende lo no a haci si no tabata bao influencia di alcohol. Consumo di alcohol ta causa hopi accidente den trafico y hopi biaha cu morto.

“Y tur esaki, con pa frena e desaroyonan aki ta door di aumenta e impuesto di importacion riba esakinan”, e dignatario a subraya.

E mandatario a menciona cu esaki ta e cambionan den fase 1 y asina aña habri lo sigui traha riba fase 2.

 

 

- Advertisement -

DUNA COMENTARIO

Please enter your comment!
Please enter your name here