Home Hudicial Ocho aña di Prison pa homber cu a abusa di su propio...

Ocho aña di Prison pa homber cu a abusa di su propio dos yiu muher

838
0
SHARE
- Advertisement -

ORANJESTAD (AAN): Manera DIARIO a publica, Diabierna mainta Hues di Corte den Promer Instancia a dicta sentencia contra e homber R., haya culpable di a abusa di su mesun dos yiunan muher menor di edad y a hasta saca un na estado. Hues ta haya cu teniendo cuenta cu sentencianan di Hof, mester condena R. na 8 aña di prison, igual na loke Fiscal a exigi.

E homber R. a presenta den Corte dilanti Hues pa scucha su sentencia. Por a nota cu e mama di e muchanan e biaha aki no a presenta.

    ABUSA DI CONFIANZA COMO TATA:

Hues a bisa cu ta keda legalmente proba cu R. a abusa sexual di su dos yiunan muher menor di edad. Hues a bisa cu R. mes a admiti tur cos. Hues a tene na cuenta cu pa un tempo largo, entre 2013 y 2018, R. a tene relacion sexual y diferente biaha pa siman cu su yiunan menor di edad. El a cuminsa abusa di un desde cu e tin 12 aña y e otro desde cu e tin 10 aña. E tabata haci esaki na cas.

Hues ta haya esaki hopi serio. Hues a bisa cu R. a abusa di e confianza di tata cu e muchanan mester tin. Hues a reclama R., cu un tata cu mester a defende su yiunan contra otronan, a bay abusa sexualmente di su yiunan.

Hues a sigui bisa cu envez cu R. a laga su yiunan sinti sigur como famia, el a abusa di nan. E muchanan lo por keda afecta pa resto di nan bida.

   MUCHA A HACI ABORTUS:

Hues a remarca cu e acusado R. solamente a pensa den su gana di tene relacion sexual. E cos mas serio tabata cu un di e muchanan a sali na estado y mester a haci abortus. Hues a tuma R. hopi na malo pa esaki.

    CASTIGO:

Pa cu e castigo, Hues a bisa cu e ta tene cuenta cu raport di psycologo cu R. no por ta completo responsabel pa su actonan. Sinembargo Hues a mustra cu e psycologo ta mustra cu R. sa cu loke el a haci ta malo. Psycologo ta mustra tambe cu e chens ta existi cu R. lo por bolbe haci mesun cos.

Hues a mustra cu Reclasering tambe ta mustra esaki. Hues ta haya cu e castigo exigi pa Fiscal ta na su lugar. Hues a mustra cu el a mira castigonan cu Hof di Corte Superior ta duna pa casonan asina serio y no por otro cu condena R. na 8 aña di prison, kitando e tempo cu e ta sera caba den KIA.

Por a nota cu R. no a haci ningun expresion di duele of arepentimento. Despues di a scucha su castigo, el a laga e miembronan di CEA bisti su boei na su man y el a cana bay.

Increibel con un tata ta bay asina leu pa abusa di su mesun yiunan pa asina tanto tempo y hasta saca un na estado.

DIARIO ta aclaria, cu no a ricibi nomber completo di e acusado, solamente su inicial R.!

Ademas di esey,  compara cu antes, awendia fotografonan no ta haya chens di saca nan potret mas ora nan drenta of sali for di Corte di Husticia.  Pesey no tin potret di dje disponible.

- Advertisement -

DUNA COMENTARIO

Please enter your comment!
Please enter your name here