Home Religion y Espiritualidad Parokia “Inmaculada Concepcion” Santa Cruz ta invita pa Fiesta patronal y Misa...

Parokia “Inmaculada Concepcion” Santa Cruz ta invita pa Fiesta patronal y Misa nacional

71
0
SHARE
- Advertisement -

ORANJESTAD (AAN): Pastor Jairo Maduro ta participa cu Diasabra awo, dia 8 di December 2018 Parokia di Santa Cruz ta di hubilo cu Fiesta di “Inmaculada Concepcion di Birgen Maria”, patrona di Diocesis di Willemstad y di parokia di Santa Cruz.

Como preparacion pa e gran celebracion aki, fielnan ta bini hunto den un NOBENA na honor di La Birgen Maria cu a cuminsa dia 29 di november y lo termina diabierna, 7 di december. Ta haci un yamada na un y tur specialmente parokiano pa acudi na e Nobena y Misa pa roga La Birgen Maria pa pais Aruba y tur hogar. Riba e ultimo dia di Nobena, despues di Misa lo sigui cu 24 ora di Adoracion, cu Exposicion di Santisimo te 6:00 di mainta.

Fielnan di gruponan di oracion y debocion lo compaña Santisimo henter anochi y lo ta agradecido si mas hende uni cu nan den oracion y adoracion na Santisimo. Como ta fiesta warda, diasabra, dia 8 di december pa 6:00am lo tin Santo Sacrificio di Misa. Despues di Misa lo sigui cu Adoracion na Santisimo henter dia te 6:00 di atardi. Henter pueblo di Aruba, sin importa edad, ta invita pa yega maske ta un rato pa den silencio adora Santisimo.

Pa 6:00 di atardi ta invita parokianonan di Santa Cruz y tur otro parokia pa tuma parti na un procesion cu Santisimo y La Birgen cu lo sali for di parkinglot pariba di misa. Despues di e Procesion ta sigui Misa Solem Nacional cu clausura di aña di hubileo di Bisdom di Willemstad, celebra pa Mgr. Luis Secco hunto cu tur Pastor di otro parokia. Lo no tin Misa den otro parokianan.

Pastor Jairo Maduro ta haci uso di e oportunidad aki pa invita henter pueblo di Aruba pa tuma parti na e gran celebracion aki. Ban pidi La Birgen Maria pa intercede cerca su Yiu Hesus pa un bida di humildad y entrega total na Dios pa obtene Gloria eterno, manera el a priminti esnan humilde di curazon.

 

- Advertisement -

DUNA COMENTARIO

Please enter your comment!
Please enter your name here