Preso a haya 15 hinca den KIA y famianan no a ni wordo notifica

    5755
    0
    SHARE
    - Advertisement -

    Caso serio

    ORANJESTAD (AAN): Famianan tin varios dia caba ta canando un caminda di cruz, enbusca di yudanza di instancianan oficial, cu e deseo grandi di haya sa kico exactamente a socede den di dos siman di December den Prison di KIA na Aruba.

    Un caso serio di hincamento entre presonan, a laga e teenager herida.  Y a dura te 2 dia despues cu porfin e famia di e hoben a wordo notifica.

    Esaki ya caba tin famianan sumamente disgusta, esta cu Prison di KIA no a notifica famia.  Ta e preso mes a haci uso di telefon publico den KIA, pa asina yama y notifica su mama.

    Loke a pone cu e famianan a cuminza cana caminda oficial pa asina exigi splicacion di instancianan encuanto e susedido, ta e hecho cu te e siman aki, ainda e hoben no a wordo hiba Hospital.

    “Mi yiu a haya 15 hinca brutalmente na su curpa, y algun di nan tin profundidad di 3 centimeter,” e mama a relata na DIARIO.

    E no por compronde, di con ningun rato no a hibe pa Servicio di Emergencia na Hospital pa asina haci un examinacion completo.

    A lo menos, el a bin haya sa cu Recherche si a wordo envolvi den e caso aki, y cu personal di autoridadnan forensico di BFTO lo a bay saca potret.

    Pero ningun rato, ni e mayornan, tampoco Oficina di Reclassering no a wordo poni na altura di e sucedido aki.  No a tende tampoco nada kico a pasa cu e otro preso cu a propina e 15 hinca aki, usando un cuchiu.

    Famia tin hopi pregunta, y nada di contesta.  Pasobra nan a busca tur forma pa haya contacto sea telefonico of personal cu e Hefe cu ta maneha Prison di KIA actualmente.  Despues di dos siman, ainda nada.  “Semper nan tin un excusa di con e Hefe no tey,” e mama a relata na DIARIO.

    Finalmente e guardianan si a bisa e famianan, pa nan bin numa mira nan yiu riba Diahuebs, pasobra e “ta fuera di peligro”.  Pero mas cu esey, e guardianan no kier papia.

    Despues di no a logra nada, famia a acudi na Reclassering pa check si nan lo por tin informacion.  Pa nan sorpresa, ata Reclassering no sa nada di e hincamento aki cu a tuma lugar den di dos siman di December.  Nan a bin tende si, cu tin un Comision di Trahador Social den KIA.  Di con nan no a notifica Reclassering, ta un misterio.

    Famia a acudi tambe na Ministerio Publico encuanto e asunto aki, pasobra nan no ta di acuerdo cu loke ta pasando den Prison di KIA.  Aki ta referi na e hecho cu e otro presonan a horta casi tur paña cu e preso teenager tin den su Cel.

    Tambe a cuestiona di con hopi tempo no a tende mas den prensa, con Guardianan di KIA y esnan di CEA no ta tene razzia enbusca di obhetonan prohibi den celnan, incluyendo tur tipo di arma.

    Famianan ta exigi pa e derecho humano di e preso aki, hunto cu e derecho di tur otro wordo respeta.  Nan kier sa, con bin por tin inseguridad den gran escala asina den KIA.

    Fuera di esey, awor cu nan yiu tin par di luna eyden encarcela, nan ta bin nota cu den Instituto Coreccional di KIA, e presonan ta siña nada di ofishi, ni pa siña haci trabao, nada.  Ni pa actividad.   Pues e caso aki ta tristo pa tur preso na Aruba.

     

    - Advertisement -

    DUNA COMENTARIO

    Please enter your comment!
    Please enter your name here