Home Deporte Redactor Deportivo Robby Burleson di DIARIO a fayece repentinamente

Redactor Deportivo Robby Burleson di DIARIO a fayece repentinamente

2113
0
SHARE
— Edgar R. "Robby" Burleson a bay descansa.
- Advertisement -

ORANJESTAD (AAN): Cu inmenso tristeza, seccion DIARIO Deportivo ta participa cu nos Redactor Deportivo, Robby Burleson a fayece Diamars anochi, debi na un hemoragia cerebral cu el a sufri mainta.

Robby Burleson ta uno cu semper a defende deporte cu alma y cuerpo, y tabata stima tur loke tin di haber cu esaki.  Fuera di ta amante grandi di deporte, el a sa di cubri noticianan di suceso, entrevista cu personahenan mundial di deporte.

Ademas di esaki, Robby tabata un referee tambe pa competencianan local di Basketball na Aruba.

Fuera di tur esaki, su amor tabata grandi tambe pa tur actividad Carnavalesco.  Y pesey mes a cuminza skirbi columna dedica na e actividad cultural ey, y tabata usa e pseudonimo di “Skribidi”.  E tabata cubri semper tur evento di Calypso & Roadmarch Contest te den oranan di mainta, como tambe festivalnan di Tumba.  E tabata un genio den Darkroom cu su habilidad di laba film, y imprimi potret cu velocidad relampago.

Pa su precision den su trabao, e tabata yuda DIARIO tambe cu trabaonan delicado di administracion, y fuera di esey tabata ultimo añanan encarga cu e aspecto di calidad pa cu publicacion di Anuncionan di Fayecimento.

E tabata sufri di un quebrante di salud algun siman pasa, y Diamars mainta lo a sufri e hemoragia cerebral, y a cay den baño.  Cu urgencia el a ser transporta pa Hospital, unda despues di como 12 ora el a hala su ultimo rosea.

Mundo Deportivo y sigur prensa na Aruba a perde un gran amigo, un gran persona, semper chistoso y bon informa.  Edgar R. Burleson a fayece cu 68 aña di edad, y a bay lagando su esposa Gina, y su yiu Miguelito.  Condolencia na coleganan, y na su famia.

- Advertisement -

DUNA COMENTARIO

Please enter your comment!
Please enter your name here