Home Parlamento Tin un deficiencia formal den e proceso pa atende casonan di abuso...

Tin un deficiencia formal den e proceso pa atende casonan di abuso di mucha

30
0
SHARE
- Advertisement -

Parlamentario Sue-Ann Ras (MEP):

ORANJESTAD (AAN):  E proceso pa yega na aplica e castigonan halto y/of maximo den e casonan di abuso di mucha tin hopi fayo, buraco den ley y falta di material confiabel, cu ta pone cu dificilmente por actua corectamente, ora cu ta trata e victimanan di abuso, particularmente abuso di mucha.

Parlamentario Sue-Ann Ras (MEP) recientemente durante un conferencia di prensa a mustra kico tur ta e problemanan, segun e rapport di ‘Wie Zwijgt Stemt Taboe’ di Anne Hofman di augustus 2017. E parlamentario ta mustra cu, mientras berdad tin adaptacion haci na e leynan di ofensa sexual na 2014, tin varios motibo cu no por aplica e leynan corectamente.

Y ta netamente e ‘mankementen’ aki, ta loke ta stroba e proceso completo di cana pa haya un castigo mas halto. E castigonan di abuso/violencia di mucha ta varia di 4 aña te un maximo di 12 aña. Ras no a sconde e problemanan, pero a opta pa pone nan ‘riba un rij’ y spera cu esaki por trece cambio pronto.

STROBA IMPLEMENTACION
E prome ta e falta di material confiabel, pa traha cu ne y uza den corte durante un caso. E instrumentonan aki ta loke netamente tin mester pa uza, pa ‘bouw op’ e caso den corte. Pa haci investigacion genital na hospital, tin deficiencia di un colposcoop (camara pa uza pa saca potret interno), pa haya e spoornan di e ofensa.

Colposcoop ta un instrumento hopi crucial, cu mester tin ora cu bo ta trata abuso di mucha. E aparato ey ta esun cu ta saca potret di e mucha.

“Anto nos no tin esey, paso hospital no a pon’e como prioridad, door cu e.o. ta trata di e topico di abuso sexual, cu ta uno taboe y ta prefera di evita esaki y e ta costa ‘apenas’ 3 mil dollar” Ras a bisa. Despues di esey, si tin duda relaciona cu e diagnostico, a base di e imagennan, ta tuma contacto cu Forensisch Instituut di Hulanda. Esaki ta pa haya un di dos opcion y ta pone cu e proceso ta bira mas largo.

“Na momento cu bay Jeugd & Zedenpolitie, nan ta uza e ‘verhoortechnieken’, di cual nan ta indica cu nan ta adecuadamente studia pa esey. Sin embargo no ta duna posibilidad pa haya desaroyo di profesionalisacion pa keda na up to date”, Ras ta bisa.

E tecnicanan cu mester uza como strategia di entrevista ta di sumo importancia, mirando cu ta un biaha ta ‘verhoor’ e victima. Un strategia adecuado di ‘verhoor’ tin influencia riba e confiabilidad di audicion.

Otro punto ta e traduccion di e informacion adkiri. Durante traduccion por tin cierto fout den e declaracion skirbi. Tambe Ras ta mustra cu bo mester tin un espacio special, unda cu despues bo por repasa e tapenan bek, pa wak e ora, si uno a faya den algo ora di skirbi e declaracion y un studio ‘kindvriendelijk’ pa haci e interogacion.

E adultonan mester ta consciente y tene bon na cuenta, cu na momento e mucha/hoben conta algo, ta bon pa no lag’e sigui conta na mas hende. Asina por laga e suceso mas ‘steril’ posibel, p’e keda intacto y no haya un version ‘dudoso’. Indicacion cu a duna ta, cu ora e mucha conta varios hende e suceso, manera su mama, juffrouw, etc, cada bes e storia por cambia y ta bin cierto influencia di prehuicio den dje.

“E mucha den su miedo, ta conta mas hende. Y prome cu e yega na Zedenpolitie of hospital, ya e mucha a conta e storia 3 pa 5 biaha caba, cu consecuencia e storia ta cambia,” Ras a bisa. P’esey e ta sugeri pa asina cu ta sospecha algo, hib’e polis of hospital mesora, ya e storia ta mas sigur y steril.

Tambe Ras a mustra riba un formulario oficial di e meldingen haci na Directie Voogdijraad. “Door cu e valides y confiabilidad di e instrumento aki no ta midibel, tin e chens cu e situacion di e persona en cuestion, no ta debidamente delinea. E motibo di ausencia di e instrumento aki, ta door di falta di medio financiero. Tambe tin indicacion cu, door cu diferente instancia y hende a investiga e victima, e ta bira menos accesibel y por stroba un posibel investigacion policial.

Un declaracion ta dura mucho largo, y ta papia di te cu 8 luna pa un denuncia. E problema cardinal ta keda ta e falta di personal den tur sector, segun Ras. “Y pa straño cu por zona na Aruba tin a penas un specialista, cu ta haci e investigacion genital,” Ras a sigui bisa.

CASTIGO

Ras ta enfatisa cu no tin ningun castigo suficiente, pa castiga un abusador di mucha. “Mester tin un sistema di ‘nazorg’, pa ora ta sentencia un perpetrador. Paso na momento cu e sali di prison, si e no haya guia profesional, chens ta cu e por bolbe comete un barbaridad. Den mayoria caso, un perpetrador tabata tambe un victima den pasado y no a haya e ayudo necesario, pa por mehora su problemanan”, Ras a enfatisa. Ras ta papia di un tipo di Tbs (Terbeschikkingstelling) cu ainda no ta asina aplicabel na Aruba.

 

- Advertisement -

DUNA COMENTARIO

Please enter your comment!
Please enter your name here