Home Deporte Tremendo atardi di torneo “Nos cu nos” pa clausura aña 2018

Tremendo atardi di torneo “Nos cu nos” pa clausura aña 2018

74
0
SHARE
- Advertisement -

ORANJESTAD (AAN) –  Ya a bira tradicion na 99 Bar & Restaurant cu tur fin di aña ta organiza e torneo “Nos cu Nos” pa su fiel clientenan cu mayoria atardi ta bataya otro den e unico Domino Square Garden na mundo. E aña aki no tabata excepcion, y un biaha mas Dr. Han a sa di organisa un tremendo atardi pa clausura e aña 2018.

E biaha aki tabata tin dos seccion: esun “Niet Zomaar Iemand” pa esnan cu ta frecuenta henter aña casi tur atardi pa reta otro, y e seccion cu a wordo forma pa integrantenan di varios team cu a bataya otro henter aña, e liga “Multi Colore”.

Esaki ta e liga di “you never know how it’s gonna end”, e seccion caminda gasolin por cay ariba candela, ya cu “E Terror di Camay” ta participa eyden. Ya pa un tiki despues di 1’or lot a wordo tira y den seccion VIP, Tinchi ta forma patna cu “Lucky Viviano”, Salomon Heyden ta forma duo cu e Capo di tutti Capo “Don Chicho”, Tico “V” ta bira “right hand” di “Luquitas”, y por ultimo Osbaldo ta haya e famoso “Jo Cera Wega” como compinche.

Den e otro seccion varios trabuco di diferente team manera Madiki Kavel, Red Stone, Old Parr, Cab Co, Biba Lekker, etc etc a tira lot cu otro pa wak ken lo forma patna cu ken.

E bataya ta cuminsa y manera centro “meteoloco” a pronostica, lamper cu strena a cuminsa cay den liga “Multi Colore”! Stem di e “James Bond” di Camay ta rezona hunto cu un “opstand” di piscadonan di Nord! Dr. Han tin cu husa tur su diplomacia Chines pa e “opstand” no bira un asunto mescos cu e “gilet geel” nan di Francia!

N’e otro banda, den liga VIP, Chicho cu Salomon ta pasa den wowo di hangua cerca Tinchi cu Vi, y Tico “V” cu “Luquitas” tambe tin poco trabou cu e duo poderoso di Osbaldo y Jo “Cera Wega”!

Dado momento por a tende Osbaldo grita “stop di cera wega pa loco!”, y ata, Jo ta lanta bandona campo di bataya den pura pasobra el a corda cu na cas e tin “otro wega” pa bay cera! Di e forma aki Don Chicho y Salomon ta clacifica “suaaavee” pa final.

Ne otro mesa, Tico “V” ta haya un baño di awa friu ora cu contra su expectativa Tinchi y Vi ta dal nan tumba abou! Den un gran final hopi emocionante, Don Chicho y Salomon ta logra derota Tinchi cu Vi cu score di 2-1 pa asina titula campeon “Nos cu Nos” 2018 di 99 Bar & Restaurant!

Mester menciona cu e weganan tabata sumamente duro y cu solamente un sapato blanco a cay ora cu e duo di Tico “V” y Lucas ta pasa Don Chicho y Salomon un “witte schoen” pa nan bay pasa un “white christmas”.

Den liga “Multi Colore”, Roy Gurutaco di Madiki Kavel y Rafael Rodriguez di Caba Cos, ta derota Helena Kelly di Caba Cos y Tony Tribon di Biba Lekker den otro final super emocionante!

- Advertisement -

DUNA COMENTARIO

Please enter your comment!
Please enter your name here