Campaña di vacunacion lo inicia pronto
ORANJESTAD (AAN): Ronald Geerman di e Seccion di Malesanan Contagioso (DBZ) di e Departamento di Salud a trece informacion relevante durante e conferencia di prensa semanal unda a elabora riba e tema di Influenza.
El a duna di conoce cu ta importante pa ta conciente di e parti di prevencion di Influenza ya cu no ta solamente e aspecto die vacuna, pero tambe e aspecto di higiene. Cu esaki kiermen cu ora un persona tosa of nister, laba man frecuentemente y purba evita ta den gruponan grandi ora bo tin Influenza, Geerman a indica.
Tambe el a elabora riba e campaña cu Salubridad Publico ta bay tin pa cu e vacunacion. E vacuna ta bay ta disponibel na Departamento di Malesanan Contagioso pa e grupo di riesgo cu a parti entre e personanan di 60 aña bay ariba (no mester presenta cu receta di doctor). Nan solamente mester presenta cu nan AZV valido y nan por haya e vacuna.
Otro personanan cu ta cay bao di e grupo di riesgo, cu ta bao di 60 aña, nan si tin cu presenta cu nan receta di doctor pa e vacuna wordo aplica. Pa e personanan cu ta desea di haya e vacuna adicional por hay’e a costo di 20 florin.
Geerman a manifesta cu asina cu nan tin e vacuna disponible lo cuminza aplik’e na comunidad. DVG lo haci e anuncio aki y un lugar unda sigur lo ta presente pa aplica e vacuna aki ta ImSan.
Den pasado tabata tin mas o menos 12 post rond di Aruba, pero e cantidad di personanan cu a acudi na e postnan aki tabata minimo. A pone personal disponibel y tabata tin dianan cu no a vacuna ni 15 hende, a subraya.
E ora a dicidi di cambia e strategia y esaki ta cu hopi hende ta bin na DBZ mes y na ImSan (Instituto Medico San Nicolas). Si pone otro postnan esaki lo wordo anuncia, Ronald Geerman a menciona.
