Home Policial Warda Costa a bay evacua capitan cu a haya atake riba barco...

Warda Costa a bay evacua capitan cu a haya atake riba barco di carga

536
0
SHARE
— Paramedico di ImSan subiendo abordo di e barco.
- Advertisement -

ORANJESTAD (AAN): Diabierna mainta trempan, alarma a ser bati na Rescue Coordination Center (RCC) di Warda Costa.  Via esey nan a ricibi un notificacion di Aruba Ports Authority, cu algo a pasa riba lama pabao di Aruba.

E barco di carga Hanze Genua cu ta nabega bao bandera Hulandes, tabata riba e ruta di New Orleans, Louisiana (Merca) rumbo pa Aruba.

Pero algo a pasa madruga cu e capitan di e barco a haya un atake di curazon.

E tabatin mester di asistencia medico avanza urgentemente, y pesey via radio a contact Aruba Ports Authority pidiendo yudanza.

Warda Costa a prepara un accion di rescate, y a haya un Paramedico di ImSan tambe pa bay hunto cu nan.

Mesora e Super Rhib di Warda Costa a sali pa e barco cu a mara net 4,7 kilometer pabao di Malmok.

Aki e Paramedico tambe a subi den e barco, y a check e señalnan vital di e Capitan.  Asina a dicidi cu enberdad tin di bay cune pa Hospital.  E Capitan a baha abao riba e Super Rhib, y asina a nabega cu e pacient pa 6.1 km rumbo pa Pier di Hadicurari caminda tabatin un Ambulance wardando pa transporte pa Dr. Horacio Oduber Hospital.

Door di un bon colaboracion cu ImSan Ambulancedienst por a duna asistencia rapido na e homber.  E barco mes a keda ancra na e lugar ey te atardi laat.

Mensahe a drenta despues cu e Capitan ta stabil y por a regresa e barco back.  Sinembargo e ta haya medicamento pa controla su curazon.

- Advertisement -

DUNA COMENTARIO

Please enter your comment!
Please enter your name here