FADA a uni forza cu Kidneys 297:
ORANJESTAD (AAN) — Fundacion Anti Droga Aruba (FADA) a uni cu Fundacion Kidneys 297, y den conferencia di prensa, e damanan Rulienne Arends di FADA, Miluska Sneek y su colega Nathasha a duna informacion.
Arends a splica e motibo pa cual FADA a uni cu Fundacion Kidneys 297. Esaki ta pasobra FADA ta traha riba e tereno di prevencion, no solamente tocante diferente tipo di droga y consumo di alcohol, pero tambe ta duna e adultonan informacion relaciona cu remedinan cu nan ta haya riba receta, pero cu semper tin e peligro si nan ta bay combina esakinan cu alcohol y specialmente pa loke ta concerni riñon.
FADA ta kere cu uniendo forza cu e Fundacion cu ta traha duro tocante e salud di riñon, ta yuda ambos fundacion. Nan kier concientiza comunidad riba e peligronan cu alcohol, remedi of otro substancianan por trece cune, y pesey nan tabata tin un lanzamento special di un video cu Kidneys 297 a prepara.
Seguidamente, Miluska Sneek, presidente di K-297 a splica cu nan ta un Stichting cu ta purba preveni e malesa cronico di riñon, y el a splica cu e ex-secretario di e fundacion, un hoben yama Juan Pablo, a logra di traha un video den cual e kier a proyecta kico ta e uso di alcohol bao e hobennan y kico su consecuencianan.
Fundacion Kidneys 297 a cera man cu FADA pasobra e aña aki nan tin e bunita lema: “Bo escogencia tin consecuencia” y e hobennan cu a produci e video ta mustra kico por ta e consecuencianan ora nan consumi alcohol den exceso, y con ora e hobennan ta participa den fiesta no solamente carnaval, pero ora nan bay hunto den un actividad, pa nan tene cuenta kico ta e consecuencia di acceso na alcohol.
E vocero di Fundacion Kidneys 297, sra. Natasha, a menciona cu e sugerencia di e fundacion ta pa e hobennan purba di bebe mas awa y menos alcohol.
Awa ta un manera pa alimenta nos curpa, e ta purifica e sanger y ta haci cu nos organonan ta keda den balansa y e awa di nos curpa ta permanece limpi y vooral den e temporada di calor aki, y cu nos hobennan ta haci hopi uso y abusa di alcohol, pero ademas den nan comunicacion nan ta uza diferente tipo di droga. Pesey nan kier concientiza pueblo pa bebe suficiente awa.
No ta mescos cu bebe juice cu no por purifica e funcion cu riñon ta haci.
